Wendoxê delalî,

wezîfeyê nuştişê mektuba xeyrwaz û weşvîne seba serra newîye, mektuba ke merdim wazeno nîya her serre serê serre de biwano, no bitaybetî emser wezîfeyêdo zor o. Serra 2020î nika qedîyaye, la giranîya xo hema vileyê ma ser o ya. Xora, seba kurdan her serre bi asteng û zehmetîyan yena, la emser pêro derd, dagîrker û dewletan ser o pandemîya Covîd-19î kî bîye para ma. Eke ma serra 2020î ra derse bicêrîme, no yo ke çîyê qetî nîyo. Coka ma hêvî kenîme ke 2021 do dirbetanê emserî weş bikero. Ancîya ma sebr kenîme û bi baldarî qayît kenîme ke serra ameyoxe ma rê çi bîyaro. Hema-hema qet çî qetî nîyo, la yew çî raşt vejîya: hêvî tim esta.

2021 bibo serra hêvî

Seba ma na hêvî hêvîya rojanê ameyoxan a. Her roje ke şona, DêrsimInfo kokê xo medyaya kirmanckî de keno pêt. Heto bîn ra kî eynî wext de dara kirmanckî bi kar û gureyê DêrsimInfo rewîna. Ma des û yew serrî ra ver seba xizmetê ziwanê xo kewtîme na raye. Ewro xizmetî ra teber ma vînenîme ke ziwanê ma û ma bîyîme yew. Pêro cuya ma çarnîyaye kirmanckî ser. Teyna ma ziwanî rê ney, ziwan kî xizmetê ma keno. Hêvîya ma a ya ke kirmanckî serra verê ma de kî hîna zaf bibo pête û vilaye.

Serra 2020î ma rê xeylê çî musna. Ma dî ke yew vîruso qijkek şîkîno pêro dinya bicêro binê bandura xo. Ma dî ke selahîyetdarê dinya goş ro zanyar û zanayoxan nênanê û ke her welat qayîtê menfeatê xo keno. La ma ancîya dî ke nê wextanê tengan de merdimîye hema nêmerda û ke kesê rindî tim vejînê ver. Doktor û hemşîrayê neqefilbarî, cigêrayoxê bargiranî û şaro ke hetê cîran û belengazanê xo keno. Nê kesî qehremanê 2020î yê raştikên ê. Hêvîya ma ya ke komel êndî qîymetê nê cewheran bivîno.

Duştê pêro merc û şertan de ekîpa DêrsimInfoyî berpirsîyarîya xo ra cênêbirîya. Ma ancîya nuşte, vîdeo û dokumanterê kirmanckî viraştî û şima de pare kerdî. Beşo 1. yê dokumanterê Dr. Qasimloyî, rêzo 9. yê Şaristananê Dinya ra, dokumanterê Mazlum Doganî ûêb. kanalê ma yê YouTubeyî de vejîyayî. Bitaybetî medyaya sosyale de ma gamê xo tenêna eştî raver. Ma na serre tarîx ser o vindetîme û no proje 2021 de kî dewam beno. Planê ma yo ke ma tarîxê kurdan bi kirmanckî bîyarîme ekranan ser. Hêvîya ma a ya ke no talîya bîne pirr bikero.

Sebebê rejîmê Tirkîya yê antî-demokratîkî ra hîna şarê ma besenêkeno Tirkîya ra bireso keyepelê ma. Sansur û qedexekerdişî emser kî dewam kerd. Teyna Tirkîya de ney, ma no sansur Facebook û Youtube de kî dî. Semedê gerreyan ra xeylê xeber û vîdeoyê ma ameyê vetene. Çi esto ke ma ancîya xo ver o danîme, xo adapte kenîme û bi sereyo berz raya xo ra şonîme. Hêvîya ma ya a ya ke serra 2021î de ma zorê nê astengan berîme. 

Ma hêvîdar manenîme. Zor û zehmetîyê 2020î ma pey de manenê. Ewro çimê ma ver der ê. Game bi game ma raver şonîme.

Şima weş û war bê

Xo vîr ra mekerîme ke ma na raywanîye de teyna nîyîme. Pêro emeg û keda ma bê piştgirîya kedkar û karkeranê ma mumkîn nêbîyêne. Ekîpa ma ancîya bi zerrîwazîye û zerrîweşîye muhtawaya ma kerde dewlemende, nuştoxê ma kî bi qelemanê xo yê jîran reng da cuya ma. Peynîye de kî pêro wendoxanê ma weş û war bê ke duştê pêro sansur û zehmetîyanê 2020î de ma taqîb kenê, wanenê û fikranê xo ma de pare kenê. Ma wazenîme ke şima kî beşdarê DêrsimInfoyî bibê. Eke şima dest de derheqê kirmanc û Kirmancîye de resim, nuşteyî, vîdeoyî ûêb. estê, ma rê birusnê. Eke ca der ê, ma bi keyfweşîye neşr bikerîme. Nîya DêrsimInfo bibo hemkarîya pêro kirmancan.

Ma weşîya şima wazenîme. Serra şima ya newîye bimbarek bo û gaxanê şima kî şên bo!

CEWAB BIDE

Keremê xo ra şîroveyê xo binuse
Keremê xo ra nameyê xo binuse