Wendoxê delalî,
nasname û kamîya merdimî tim kulturê merdimî rê girêdaye yê. Nuştoxê almanê yahudî Arnold Zweîgî reyê va: “Seveknayîşê aştîye û seveknayîşê kulturî yew o.” Na raştîye her newroze de reyna kewena çimanê ma ver. Herçiqas ke heqê kurdan xeylê parçeyanê Kurdîstanî de hîna binê zulm û teda der ê, ziwanê înan qedexe ya kî tomet a, nasname û kulturê înan kî binpay beno, ancîya her newroze her cayo ke tede kurdî est ê, uca her reng ra yenê têlewe û newroze bimbarek kenê. No bimbarekkerdiş teyna xoverodayîş û reflekso sîyasî nîyo. No, kulturê xo seveknayîş û ney de pîya aştîye waştiş o.
Wisarê 2022î de kulturê ma hîna binê tehlukeyî der o. Naca-haca gamê rind û elzemî erzînê, la wexto herbî de têvereştiş wezîfeyo zehmetin maneno. Wezîfedarê ma yê ewroyî ke bi zerrîya xo wext, kede û pereyanê xo ra gureyanê qîymetinan vejenê ver ke ziwan, nasname û kulturê ma cande bimano, ê çimê ma de Kawayê modern ê. Serre de reyê govende kewtiş asan o, la her roja Heqî de rawuştiş û duştê têde şertan de xizmetê şarê xo kerdiş karê qehremanan o.
Şima do nê rojan de derheqê destan û çêranê efsanewîyan de xeylê hîkayeyan biwanê. La hîkayeyê kedkaranê kulturî yê bêvengan zêde nênê ra ziwan. Coka, bi wesîleyê newroze, ma ewro wazenîme înan bîyarîme xo vîr. Xo vîr ra mekerîme ke Dehakê ewroyî teyna dewletê dagîrkerî û zorbazê zulmkarî ney, la asîmîlasyon, vîndîbîyayîş û deman reyde rovilêşîyayîş o kî. Her keso ke xo rê kerd wezîfe ke duştê na felakete de vejîyo, sey adirê newroze ma rê beno roştî.
Romevilêşîyê. Kulturê xo biseveknê.
Newroz û hewtemalê şima bimbarek bo!
Bimanê weşîye de,
