Çîpî semîkonduktorî zerrîya rewîyayîşê ekonomî, asayîş û înovasyonê teknolojîya ewroyên ê. Bê nê çîpanê tenikan zafêrîya teknolojîya ewroyî mumkîn nêbîyêne: telefonê biaqilî, komputerî, makînayê elektronîkî, bazirganîya Înternetî, erebeyî û hetta çekê hîpersonîkî, zereyê pêrune de çîpê semîkondutorî est ê. Nê çîpî muyê însanî ra dahîna barî yê û da-40 mîlyar parçeyan ra yenê pêra. Şorişê endustrî ra teber na teknolojî dinya vurnaye.
Ewro, bi raverşîyayîşê aqilê viraşteyî (AI), komputurkarîya kwantûmî, “înternetê çîyan” (Internet of things) û lezîya 5G hewceyîya nê tewir çîpan daîma bena zêde. Naye tede têvereştişê DYA û Çînî sey viraştoxanê nê çîpan kile cêno.
2020 de DYA para %48 yê (193 mîlyar Dollarî) pîyaseyê semîkondukturan kontrol kerdî. Çîn kî tewr zêde çîpan hêrîneno. Serra 2020î de Çînî 350 mîlyar Dollarî seba hêrînayîşê çîpan xerc kerd. Nê semedî ra armancê Çînî yo ke markaya çîpî ya netewîye awan bikero û nîya 2025 ra tepîya dîwelan ra xoser bibo. Labelê pîsporî anê ra ziwan ke herçiqas Çînî mîlyar Dollarî sermayegozarî kerde, ancax 10 serrî de besekeno sektorê çîpî de xoser bibo.
