Wendoxê ma yê delalî,
serra bîne binê sîya pandemî de vêrde ra. Ancîya, ma karê xo ra dewam kerd. Emser çendna projeyî qedîyayî, ma pirtikêna reştîme armancê xo. Nê projeyan ra klîbê Dr. Şivan û dokumantarê Dr. Nurî Dêrsimî yê 73 deqayan kewenê çimê merdimî. Dokumanterê ma yê bînî tayê babetê balkêşî îzah kerdî, sey usûlê dîktatoran ya kî heyatê serekkomaran: ma hem serekkomarê DYA Joe Bîden hem kî serekkomaro tewr feqîr Jose Mujîca dayî naskerdene. Ser o kî ma roşnvîrê kurdan Dr. Nûredîn Zaza bi yew dokumanterî yad kerd. Peynîye de, ma ozanê Dêrsimî yo efsanewî Sey Qajî ard verê çimanê seyrkerdoxan.
Nê projeyî keda xeylê zerrîwazanê ma yê qedrberzan ê ke bi hewteyan pê cigêrayîş, arêdayîş, redaktekerdiş û vîdeoviraştiş para xo danê û nîya eseranê kirmanckî (zazakî) ser yewna kemere nanê ro. Çi heyf o ke keyepelê ma Tirkîya de hîna qedexe yo. Heto bîn ra kî medyaya sosyale sey Facebook û YouTube de ma di-hîrê reyî ameyîme sansurkerdene: tayê vîdeoyê ma bîlasebeb ameyî wedardene. Çi esto ke duştê her astengî de ma karê xo yê vîdeoyan ra dewam kerd û hîna kî kenîme. Gureyê ma gureyê aşm û serran o. Va çiqas pêt yeno wa bêro, ma ancîya na çila fînenîme ra ci. Seyrkerdox û wendoxanê ma rê kî rica kenîme ke na çila dest bi dest bifetilnê, çîyo ke ma seba ziwanê ma virazenîme, ey qewmê ma mîyan de pare bikerê. No, pêro sansur ra dahîna muhîm o.
Par ma vatîbî ke ma 2021 hêvîdar manenîme, şert û merc çi benê wa bibê. No, wezîfeyêde asan nêbî, la ma raya xo ra nêtexelîyayîme, hîna game gamê ver erzenîme. Hêvîya ma ya ke ziwanê ma bi muhtawaya newîye dahîna dewlemend bibo, şima kî na zenginîye de şên bibê. Sey serranê verênan, 2022î de kî DêrsimInfo do karê xo yê dewlemendkerdişê medyaya kirmanckî raver bero û berhemanê neweyan pêşkêşê kirmancan û kirmanckîraheskerdoxan bikero.
Bi hêvîya yewna serra berdare, serra şima ya newîye û gaxanê şima bimbarek bo!
Bimanê weşîye de,
