Wendoxê delalî,

newroze nawa yena, verê çêberî de vindena. Çi esto ke roşanê emserî binê sîya pandemîya Covid-19î (korona) de mendo. No jano girano ke dinya keno esîre, kewt Kurdîstan kî. Coka muhîm o ke şima tedbîranê verba vîrusî cidî bicêrê. Çê de bimanê, cayê meşêrê, xo însananê bînan ra dûrî fîyê. Hem xo hem kî dorûverê xo biseveknê. Nika şima yê vanê: newroze bê adirî, bê teberşîyayîşî, bê govend û bê coş û heycanî qet bena? Bena.

Ruhê newroze zey adirê newroz o. Bingeyê adirî ke kolî yo, bingeyê ruhê newroze kî hîsîyatê kurdan o. Newroze tena reqis û kilame nîya. Newroze roja newî ya, ameyîşê wisarî yo, neweradinyaameyîş o, xoverodayîş o. Verê ke teber ra biveşo, ganî adirê newroze zerrîya ma de webo. Vanê, rojanê tengan de karekterê merdimî bellî beno. Ma kî vanîme, rojanê tengan de taybetmendîya şarî bellî bena. Coka muhîm o ke ma nê rojan de roşanê xo dahîna zêde bimbarek bikerîme. Çêyê xo de, be merdimanê xo, be kultur û ziwanê xo. Ma xo nîya tarîf bikerîme.

Seba ke newroza çêyî bi keyf û canê Kirmancîye ravêro, tayê pêşnîyazan pêşkêşê şima kenîme ke merdim çê ra senî newroze bimbarek bikero:

  • Roja newroze xo bixemilnê. Şelwaran û pûşîyanê xo vejê, şal û şapik xo ra dê.
  • Seba newroze nan bipojê, ha zerfet bo, ha goşt bo, la çîyêdo taybetî bo.
  • Keyeyê xo bi keskûsûre bixemilnê. Eke estê, xo rê tayê vilîkan bihêrînê wa keyeyê şima ra boya wisarî bêro.
  • Herçiqas ke mumkîn o, zêde meymanan keye mîyarê. Teyna be keyeyê xo roşanî bimbarek bikerê, pê telefon ya kî vîdeo biresê nas û dostanê bînan û roşanê înan bimbarek bikerê.
  • Eke baxçe ya kî ocaxê şima esto, adir wekerê. Eke nêbeno, xo rê tayê muman tafîyê.
  • Kilamanê newroze, yê şên û şayî goşdarî bikerê. Tewsîye beno ke merdim raver ra xo rê lîsteya kilaman hazir bikero.
  • Keyf bikerê! Bireqişîyê, hîkayeyan vajê, kayan kay bikerê. Şayîya newroze dinya de pare bikerê! Pê vîdeoyanê xo Înternetî pirrê hewayê newroze bikerê!

Nê rojî kî vêrenê ra. Şewlete ra dime tim şodir yeno. Adirê zerrîya xo berz bicêrê ke roştîya ci kurdanê bînan rê bibo rayber. Senî ke Kawayê asinkarî duştê zulm û zordarîye de vejîyo, ma kî henî nê wextanê tengan ra be sereberzîye û zerrîweşîye kewenîme ser.

Be hêvîya ke roşanê şima be weşî û warîye ra ravêro, newroza şima bimbarek bo!

Bimanê weşîye de!

CEWAB BIDE

Keremê xo ra şîroveyê xo binuse
Keremê xo ra nameyê xo binuse