Ez ke rind zana, Can TVî 1. gulana serra 2018î de dest bi weşanê xo kerdbî. A roje ra nat, Can TV xizmetê qomê ma der o. No xizmetê xo kî goreyê hêz û qewetê xo, goreyê îmkanan û tecrûbeyê xo anê ca. Roje bi roje verba rind û rindekîye raye cênê, naye ra kî ma benîme keyfweş û zaf kî benîme bextewar.
Can TV, vengê mazluman o, vengê bêkesan o, vengê elewîyan o, vengê kirmancan o, vengê heq û heqîqatî yo. Na mana de gere ma kî vengê xo rê, rengê xo rê wayîr vejîme, desteg ciderîme ke wa Can TV kî vengê ma biresno şarê ma û şaranê bînan.
Mordemî ke yew kanalê televîzîyonî temaşe kerd, gere mordem kî xo ê kanalê televîzîyonî de bi rengê ziwan û kulturê xo uca de xo bivîno. Rind-xirab ewro ma kî xo Can TV de vînenîme. Ewro êdî dezgehê ma, komelê ma roje bi roje xo gureto ra û linganê xo ser o vindenê. Êdî wayîrê hêz û qewetî yê, wayîrê soz û îqrarî yê.
Ez henî bawer kena Can TV de hîrê ziwanî (kirmanckî, kirdaskî û tirkî) yenê qeseykerdene û hîrê ziwanan de programî yenê amadekerdene. No kî musneno ke Can TV zaf rengin û zaf kî vengin o. Heta nika ez bawer kena bi ziwanê ma kirmanckî di-hîrê programî bîyî, la nê demê neweyî de xeylê programê kirmanckî Can TV de weşanînê. No semed ra kî ma bi nê programanê kirmanckî benîme keyfweş û bextewar.
Raşta kî nê demê neweyî de Can TV de tayê programanê neweyan dest bi weşanê xo kerd. Programê ke bi kirmanckî yenê ekrananê Can TVî ser, nê yê:
- Welî Haydar Guleç bi nameyê programê “Vatîş”î rojanê sêşemeyî saeta 20:00 de (bi saeta Kurdîstanî) yeno ekrananê Can TVî ser.
- Gule Mayêra bi nameyê programê “Şîyasanî” rojanê ponşemeyî saeta 16:00 de (bi saeta Kurdîstanî) yena ekrananê Can TVî ser.
- Şengule Pak bi nameyê programê “Berteng”î rojanê çarşemeyî saeta 21:00 de (bi saeta Ewropa) yena ekrananê Can TVî ser.
- Hulya Şîmşek bi nameyê programê “Soja sure” rojanê çarşemeyî saeta 20:00 de (bi saeta Ewropa) yena ekrananê Can TVî ser.
- Yew hevala man a hêcaye kî bi namêyê programê xo “Heqîbê Perperikî” û bi rengê welatî yena ekrananê Can TVî ser.
Oncîya nê demê neweyî de tayê hevalanê ma yê hêcayan kî ekrananê Can TVî de dest bi proramanê xo kerd. Nê programê neweyî kî tayê xo nê yê:
- Alî Dogan Gonultaş bi namêyê programê xo “Sesler ve Îzler”.
- Soner Soyer bi namêyê programê xo “Açik Mikrofon”.
- Hasan Saglam bi namêyê programê xo “DEM”.
- Cengîz Aslan bi namêyê programê xo “Kilamê Dilan”.
Can TV de nîya bi rêzê programî dewam kenê şonê. Ma kî kesê ke seba Can TV xizmet û fedakarîye kenê, ma nê kedkaran û fedakaran pêrune fîraz kenîme û înan rê nê rayîrî de serkewtene wazenîme. Can TV veng û rengê ma yo.
