Tilsim
xeripîya…
Tilsim xeripîya
Şikîya pergalê emrê mi
Her çî bî tarûmar
Û hişê mi sey kuwareyê hingan têmîyankewte
Zereyê mi de bîrêko kor û bêbin
Û her şewe bêvindetiş mi anceno talîya xo…
Tilsim xeripîya…
Bîya heşar xeyalêko xîlafe ra, talîyêka bêpeynî ra
Ameya ginaya nê wextî yo ke hukmê ci xiştik a.
Nika rayîranê xir û xalî de,
Ê daxê korî ra, xêxê binê çermeyê xo ra gêrana
O xêxo ke kes nêvîneno, kes hîs nêkeno û bêar o…
Tilsim xeripîya…
Çimanê mi de reyna a vinika hewnî ya vêşane
Şewanê mi de tim puyo kor gujige de yo
Reyna kutikê sîyayê korî zurayîş de…
Asmên ra hurdî-hurdî estareyî xij benê
Çengê destanê mi de estareyê ke rîyê asmênî ra xij bîyê
Û ci ra boya dergûşanê sewîyan a emrkilman…
Tilsim xeripîya…
Her şewe hewnanê mi pukê zimistanî yê harî şunê benê.
Bîranê tarîyan de bê pirên, bê xeyalan manena.
Ez a ke maran ra zaf hes kena û pirênanê ci ra xo rê halîn virazena
Ez a ke bêbextîya Camîsanî de veşa,
Oxro ke qet çimê mi nêginayê sitargehê Şahê Maranî ra
Labelê reyna zî serê sêneyê mi de poşmanîyêk…
Heya, axûya marê sîyayî ya serê zerrîya mi de dejê cuye û birîya to
Heya, tomete nîya dafa to de ax û zarîye…
Tilsim xeripîya…
Eşq û mergî yew gijgeleke de têvirane de
Ez û ti sey pelêk eynî dara kal û pûçe ra dardekerde
Zereyê mi de perperikêde sîya yo ke dejê ciwîyayîşî de çerixîyeno
Û teyna şewanê tarîyan de firayeno, ver bi ê merdimanê axîr zemanî…
Tilsim
xeripîya…
Resim: Gara Rasûl, “Xatireyî” – tuwal ser o boyaxê neftî (60×40)
