Serra 2020î nawo verê çêberî der a. La verê ke emser biqedîyo, ma reyê peyser nîyadîme, na serre se bîyo? Yew xulasa.
01.01.2019
57 serran ra dime Qeter rêxistina petrolî OPEC ra vejîno.
02.01.2019
Serrê ra dime çeteyê Heşd al-Şabî xo Kerkûk ra peyser ancenê û herinda înan de hêzê kurd-îraqijî kewenê şaristan. Şaredarîye hîna binê dewleta Îraqî de manena.
03.01.2019
Çîn bi wasîtaya xo ya feza reseno peyê aşme.
07.01.2019
Amazon beno şîrketê dinya yo tewr qîymetin bi erja 797 bîlyon Dollaran. Naye ra ver Microsoft cayo verên de bî.
13.01.2019
Futbolbazo namdaro arjantînij Lîonel Messî lîgê Spanya de golê xo yo 400. erzeno. Nîya beno futbolbazo verên o ke yew lîg de hende golî estê.
15.01.2019
Hîndîstan de kombîyayîşê însanan o tewr girs virazîno. 15 mîlyon kesî seba festîvala Kumbh Mela Hîndû yenê pêser ke çemanê Ganges û Yamuna de awe xo ro kerê. Pêro pîya 50 rojan de 120 mîlyon kesî yenê pêser.
20.01.2019
Bena yew serre ke Efrîn binê îşxalê artêşa Tirkîya û çeteyanê ci der o.
22.01.2019
Bi qerarê dadgehêda Anqara ra Tirkîya de da-300 websîte û hesabê xebitnayoxan yenê blokekerdene. DêrsimInfo kî teder o.
25.01.2019
Wekîla HDP ya Colemêrgî, Leyla Guvene, seba protestokerdişê îzolasyonê Ocalanî kewena grevê veşanîye û roja 79. de hepisxane ra yena vetene. Leyla roja 200. de grev caverdana.
30.01.2019
Dêrsim de seykerdena tayê heywanan qanûnî bena qedexîye. Xeylê protestoyan ra dime walîyîye seydkerdena pezkovî, heş, zerenc, verg û xeylê heywananê bînan kerde qedexe.
31.01.2019
Nuştox û rojnamegero kurdo rojhelatij, Behrûz Bûçanî, seba romanê xo “Koyan ra teber qet hevalî çin ê” xelata edebîyatê Awustralya ya Victorianî cêno. Behrûz kitabê xo de qalê cuya xo û rewşa bextwaştoxanê Awustralya keno.
03.02.2019
Papa Francis sey papayo verên Erebîstan zîyaret keno.
12.02.2019
Komara Makedonya nameyê xo yê resmî vurnena kena Komara Makedonyaya Vakurî. Nîya werênayîşo kan o ke bi Yunanîstan estbî, axir reseno peynî.
24.02.2019
Silêmanîye ra heyetê kurdanê yarsanan Dêrsim zîyaret keno. Yarsanî û Raya Heqî di bawerîyê “birayî” yê. Zîyaretê heyetî de her di komelan xo tenêna rind nas kerd, şîyî zîyar û dîyarî ser û gulbangî dayî.
15.03.2019
Xeylê welatanê dinya de wendekar û cêncî vejînê kuçeyan ke duştê sîyasetê vurîyayîşê eyamî de protesto bikerê. Pêşenga înan çêneka swêdije Greta Thunberg a.
21.03.2019
Kurdîstan û dinya de roşanê newroze bimbarek beno. Dîyarbekir de ancîya 1 mîlyon kesî yenê têlewe. Adirê newroze keyeyê Zilqif Gezenî yo ke hepisxane de canê xo da, hetê ci ra yeno wekerdene.
31.03.2019
Tirkîya û Kurdîstanê Vakurî de weçînitişê şaredarîye yenê viraştene. HDP Amed, Mêrdîn, Wan û 94 cayanê bînan de şaredarîyan qeyum ra peyser cêna. AKP Îstanbul, Anqara û Mersîn, rîyê rayanê kurdan ra kî, kena vîndî.
01.04.2019
Şîrketê petrolî yê Erebîstanê Seûdî Saudi Aramco şîrketê dinya yo tewr qîymetberz o. Par ameyeyê co 111 bîlyonî Dollar bî. Dîya zanayene ke şîrket wazeno vejîyo borsa.
08.04.2019
Sûdan de protestoyî qewimîyenê. Hedefê protestokerdoxan hukmatê Omer al-Başîrî yo. Heta peynîya serre de protestoyan de 250 kesî hetê hukmatî ra yenê kiştene û bi hezaran tewqîf benê. Herçiqas ke Omer al-Başîr hukmat ra erzîya, heta ewro problemê Sûdanî hel nêbîyî.
10.04.2019
Reya verên a ke însanî lana sîyaye ra fotograf cênê. Fotograf hetê teleskopê Event Horizonî ra serra 2017î ra nat ame girewtene. Lana Sîyaye galaksîya M87 der a, ma ra 55 roşnserî dûrî ya û 6,5 bîlyon qatî dinya ra giran a.
15.04.2019
Katedralê Parîsî yo namdar Notre Dame veşeno. Manastirê 850 serran adir girewt. Kilan wexto kilm de xeylê qisimanê awanîya kane rijnenê. Serekkomarê Fransa ra gore neweraviraştiş do dorê panc serran bicêro.
23.04.2019
WHO perpûno verên duştê nêweşîya malarîya vejena. Perpûn do bitaybetî domanan bisevekno û Malawî de yeno gurenayene.
02.05.2019
Koyê dinya yo tewr berz Mount Everest de aksîyonê pakkerdişî dest keno ci. Di hewteyan de hîrê tonî qirşî û çar meyîtî ko ra vejînê.
11.05.2019
Dokumanê neweyî vejîyayî meydan ke jenosîdê Dêrsimî de artêşa tirke gazo kîmyayî xebitnayo. Belgeyo nimite bi îmzaya Atatirkî yo. Tede Tirkîya Almanya ra vîst tonî gazê axûyinî û Amerîka ra teyarayanê bombardumanî hêrînena.
21.05.2019
Sazkerdox û CEOyê şîrketê mastî Chobanî yo kirmanc Hamdî Ulukayayî xelata bezîrganî ya “Business for Peace” cêno. Na xelate sey xelata Nobelî ya bazîrganîye yena hesibnayene. Hamdî Ulukaya Dêrsim, Erzingan de ameyo dinya û 25serrîya xo de şî DYA.
22.05.2019
Şaredarîya Dêrsimî qerar dano ke tabelayan de herinda “Tuncelî” de Dêrsim bêro nuştene. Ser o kî ame waştene ke xizmetê beledîya bi kirmanckî û kirdaskî bêrê dayene. Medyaya sosyale û partîyanê tirkan mîyan de reaksîyonê antî-kurdî vejîyayî. Înternet de etîketê “Dêrsim nîyo, Tuncelî yo” beno populer.
09.06.2019
Protestoyê Hongkongî yê ke adare ra nat dewam kenê, resenê sewîyeya newîye. Sebeb pêşnîyazê qanûnê Çînî bî ke destûr bido ke tewqîfbîyayeyê Hongkongî neql bibê Çîn û nîya sîstemê dadgerî yê Hongkongî bikewo binê bandura Çînî. Hongkong zereyê Çînî de yew mintiqaya otonom a. Madeyê qanûnî aşma êlule de peyser cêrîya, la protestoyî hîna dewam kenê. Polîsê Çînî bi şidet û guleyan verênîya protestokerdoxan cêno.
20.06.2019
Îran hewa de nanê dronê DYA ra, ey anê war. Têkilîya mabênê her di welatan hîna zaf zerar cêna.
10.06.2019
Herêmê Kurdîstanê Başûrî de Nêçîrvan Barzanî, tornê Mesûd Barzanî, beno serekkomaro newe.
12.07.2019
Tirkîya Rûsya ra sîstemê seveknayîşê hewayî hêrînena. DYA pê nê hêrînayîşê Tirkîya razî nêbenê. Na game ser DYA Tirkîya hemkarîya teyarayanê F35 ra vejenê.
16.07.2019
Dewa Bilgecî ya Pulurî de di domanan, Ayaz (8 serrî) û Nupelda (4 serrî) rîyê teqayîşî ra canê xo danê. Melumat ra gore, waye û bira şîyî mezra ke bifetelîyê, uca pay na teqebarêde viraşte.
18.07.2019
Dûhok ra grûbêda turîste şona raywanîya Deryaya Sipîye. Şaristanê Trabzonî de înan seba resimantiş Alaya Kurdîstanî vejenê. Şarê Trabzonî hêrişê grûba başûrijan kenê. Hebikê mendbî ke pêrune lînç bikerê.
27.07.2019
Dêrsim de koyê Mizûrî sey warê sayekerdişê zerrnî yenê îlankerdene. Bi no qerar şîrketî besekenê pê axûyo sîyanur Dêrsim de ro zerrn bicêre. No seba sîstemê flora yo bi 900 tewir nebatan û seba zelalîya awa binerde tehlukeyêde girs o.
19.08.2019
Hukmatê Tirkîya serekanê şaredarîyanê Amed, Wan û Mêrdînî wezîfe ra vejeno. Pêro pîya 32 şaredarîyê kurdan ancîya neqlê qeyumî benê. Tayê serekê şaredarîyan yenê tewqîfkerdene.
27.08.2019
YPG hêzanê xo sînorê Rojawan û Vakurî ra peyser ancenê. Nê gamî parçeyê pêameyîşê mabênê Tirkîya û DYA der ê ke nîya Tirkîya sînor ranêvêro. Seke aşma teşrîna verêne de yeno dîyene, Tirkîya ancîya kewena Rojawan ke kurdan de bikewo ceng.
09.09.2019
Zanyarî delîl vînenê ke merdiman 6.000 serran ra ver şitê hewyanan şimito.
23.09.2019
Şîrketê raywanî yê Brîtanya Thomas Cook 178 serran ra dime înflas keno. 600.000 raywanî dinya de nêşîkînê cayê xo biteriknê. Hukmatê Brîtanya înan mecburî xeleseno ra. No Cengê Cîhanî yo II. ra dime aksîyonê peyserardişê hemwelatîyan o tewr girs yê Brîtanya yo.
01.10.2019
Îraq de protestoyî ca cênê. Xeylê îraqijî, înan tede xeylê cêncî, şaristananê Îraq de duştê sîyasetê hukmatê xo vejînê kuçeyan. Pêkewtişan de 500 ra zêde însanî kişînê, 20.000 benê dirbetinî.
09.10.2019
Dewleta Tirkîya bi çeteyanê xo yê îslamîstan hêrişê Kurdîstanê Rojawanî kena, amerîkanî binê serekkomar Trumpî de xo peyser ancenê. Sey netîceyê cengî 250.000 kurdî mecburî welatê xo ra bar kenê, xeylê sîvîl û çekdarî yenê kiştene. Hêriş ra di hewteyî ra dime bi înîsîyatîfê DYA ra adirbes îlan beno. Pêro welatanê dîwelan de protestoyî yenê viraştene û destekê seba kurdan girs o.
26.10.2019
Serekê terorîstanê DAÎŞ, Abu Beqr al-Bexdadî, hetê ekîbê taybetî yê DYA ra yeno kiştene. Îstîhbarat û destek bitaybetî kurdanê Rojawanî ra ameyî.
30.10.2019
UNESCO şaristanê Rojhelatî Sinê cêno torra “şaristananê viraştoxan” mîyan. Na grûbe de şaristanê ke waranê huner, muzîk, folklor, sînema, edebîyat û gastronomî de pêt ê, ca cênê.
31.10.2019
Şîrketê medyaya sosyale Twîtterî îlan keno ke 22. teşrîna peyêne ra dime reklamê sîyasî platformê ey de benê qedexe. Na game hetê xeylê xebitnayox û rayapêroyî ra yena pîrozkerdene. Reqibê Twîtterî Facebook dano zanayene ke ê çîyêde henên nêkenê.
05.11.2019
Hunermenda dîyarbekirije Zehra Dogana ke hîrê serrî hepsîye bîye, Parîs de eser û kitabê xo “Yê ma kî rojê rindekî do estbê” pêşangehê de pêşkêş kena.
15.11.2019
Îran de berzbîyayîşê vayaya petrolî beno sebebê protestoyanê giranan. Protestoyî çîp resenê Kurdîstanê Rojhelatî. Uca de şar duştê rejîmê dewleta Îranî de vejîno kuçeyan. Pêro 28 eyalet û 100 şaristanan de protestoyî ca cênê. Rêxistina Amnestî ra gore 300 kesî merdî, çimeyanê bînan ra gore na hûmara 1.500 a. Texmîn beno ke nêmeyê kişîyayan kurd o.
18.11.2019
Restorano kurd “Nandîne” yê Londra xelata Eater Awards 2019 cêno. Prestîjê a xelate berz o. Restoran hetê kurdanê Başûrî ra serra 2016î de ronîya û Londra de çîp bî namdar.
22.11.2019
Kurdîstanê Başûrî de weyekerdiş û rotişê zeytunan û zeytî beno zêde. Serra 2008î de Kurdîstanê Başûrî de 170.000 zeytunêrî estbîyî, emser na hûmare bîye 23 qatî. Zeyt ra sabun û berhemê kosmetîkî yê bînî virazînê. Zeytunêrê Başûrî eslê xo ra Efrîn ra yenê. Serra 2008î de wezîrê zîretî şîbî Efrîn û darê ucayî analîz kerdbî.
09.12.2019
Hunermendê Kurdîstanê Rojhelatî yo namdar Şehram Nazerî dano zanayene ke seba ke destek bido way û birayanê xo yê Rojawanî, o do Tirkîya de konser nêdo. Şehram Nazerî Kermaşan ra yo û şîîranê şaîrê Rûmî bi mîstîkê kurdkî girê dano. O normal de her serre Konya de seba merasîmê yadkerdişê Rûmî konserê dano, la emser hunermendî semedê hêrişê artêşa Tirkîya ra konserê xo red kerd.
11.12.2019
Serdarê pêşmergeyan o kan, Xelîd Mula Hesenî, serra 2014î ra nat koyê Zartikî yê Kurdîstanê Başûrî de darî nayî ro. Pêro pîya bi 20 pêşmergeyan, Xelîdî ewro 1.200 darî nayî ro. Koyê Zartikî yo ke çolistan bî, ewro dar û daristan o.
13.12.2019
Parlamentoyê Temsîlkaran ra dime kî ewro Senatoyê DYA jenosîdê armenîyan bi hewayêde resmî kenê. Qanûno ke bi zafêrîya rayan vêrd ra, qirkerdişê armenîyan yê serra 1915î sey sucê însanîyetî nas keno. Pêro partîyê ke parlamentoyê DYA de temsîl benê, peyê qerarê qanûnî de vindetî.
14.12.2019
Dengbêjo namdar û vengê Kirmancîye, Silo Qiz, 104serrîya xo de dinyaya xo vurneno. Bi seyan kesî beşdarê merasîmê wedardişî benê.
18.12.2019
Warê koyan ê Hewramanî Tete de grûbêda kolberan pukeleka girane ra yena pêgirewtene. Di xortî, Azad Xûsrew û birayê xo Ferhad (ke 14 serrî bî), serdê koyan de cemedîyenê û mirenê. Bi seyan kesî beşdarê merasîmê cenaza benê. Merdena di xortanê kurdan reyna bale ancena rewşa kolberan ê xirabinan yê Kurdîstanê Rojhelatî.
20.12.2019
Artêşa Hewayî yê DYA beşê leşkerîye “Hêzê Feza” awan kena. No beş do tena cengê feza ser o konsantre bibo.
26.12.2019
Başûrê Asya de roj cêrîno. Sebeb vîyartişê aşme bî. No cêrîyayîşê rojî yê 2019 yo peyên o. Fealîyet Erebîstanê Seûdî ra heta Gûam yeno dîyene. Cêrîyayîşo ameyox 21. hezîrane Asyaya Mîyanêne de qewimîyeno.
