Koyê Mizurî hetê dewleta Tirkîya ra warê madengerîye îlan bîyî. No seba xoza û însananê Dêrsimî zerarêde girs o.

Ko û çimeyê Mizurî yê ke xora binê tehlukeyê projeyanê awbendan ê dewleta Tirkîya yê HESî der ê, nika juna tehluke de yenê têrî. Dewleta Tirkîya pêroyê koyanê Mizurî zey warê madengerîye îlan kerd. No war 60 km derg o û wayîrê xeylê çime, nebat û madeyanê xaman o. Ebe koyanê Mizurî, Dêrsim de nika pêro pîya 145 projeyê madenî estê. 

Koyê Mizurî serênîya çemê Firatî de, vakurê Pulurî der ê. Silsila koyan pêro pîya 130 kîlometreyî derg a. Koyo tewr berz 3.400 metre yo. Warê madengerî yo ke îlan bî, 43.500 hektar o, yanî Parka Mizurî ya Milîye ra dahîna girs o. Tede madeyê zey zern, sêm, krom û paxir estê. Ney ra kî dot uca de nebat û hewyanê tewir be tewir estê. Projeyê madengerîye na zenginîya xoza fîno ra tehlukeyan ver. Koyê Mizurî kî wayîrê xeylê çimeyanê binhardan ê. A awa çimanê Mizurî awa dinya ya tewr pakan ra hesebîna. Seba ke nê projeyanê madenî de zafane sîyanur yeno gurenayene, zeraro ekolojîk hem seba ê çimeyan hem kî seba candaranê koyan girs o. 

Koyê Mizurî (resim: PÎRHA)

Serekê şaredarîya Pulurî Mustafa Sarigulî ajansê PÎRHA de qesey kerd. Sarigulî va ke hedefê nê projeyan o ke dêrsimijî welatê xo ra dûrî fîyê. “Ti vana qey ê noca be awbend û ocaxanê madenan çîn kenê. Xozaya ma ma rê bes a. No çik o ke her ca wêran bikerê ke neslê ameyoxî rê çîyê nêmano? No xoza û mordemîye rê kîn o. Madenê ke bêrê viraştene, têde serê nê çimeyan der ê. Se beno wa bibo, ê yê her ca kenê qilêrin.” Sarigulî va ke Dêrsim de her nebate, her heywan bimbarek o. Çînkerdena nînan suc û gunêda giran a û .

CEWAB BIDE

Keremê xo ra şîroveyê xo binuse
Keremê xo ra nameyê xo binuse