Serekê rêxistina terorîste “DAÎŞ”, Abu Beqr al-Bexdadî, hetê ekîba DYA ya taybetîye ra ame kiştene. No ewro hetê serekkomarê DYA Donald Trumpî ra ame tesdîqkerdene. Nîya merdimo sereke yê rêxistina DAÎŞ kişîya. Kurdanê Rojawanî dest da operasyonê amerîkanan.

Waşîngtinî da zanayene ke operasyono leşkerî di saetî ramitî û vizêr peşewe qewimîya. Al-Bexdadî xo nêzdîyê şaristanê Îdlîbî de, sînorê Tirkîya ra da-5 kîlometre dûrî, dardbî we. Leşkeranê DYA yê taybetîyan peşewe ramit bano ke al-Bexdadî tede bî, ser. Vatena Trumpî ra gore al-Bexdadî rema şî yew tunelo kor û “timûtim nala û qîra”. Peynîye de, al-Bexdadî xo pê yelegê suîkastî teqna û nîya xo û hîrê domanê xo kiştî. “Sey kutikê tersonikî merdo. Dinya nika tikêna bîya ewlîye”, Trumpî va.

Leşkeranê amerîkanan banê al-Bexdadî de derheqê operasyonanê DAÎŞ de xeylê melumat û dayeyê muhîmî dayî arê. Goreyê şewirmendê asayîşê neteweyî Robert O’Brienî ra, nameyê “Mueller” nîya operasyon ra. Kayla Mueller yew aktîvîsta amerîkana 26 serran bîye ke hetê DAÎŞ ra pêgirîyaye, îşkence û tecawuz dî û bi zor ra bîbîye yew cinîya al-Bexdadî. Dime, a hetê DAÎŞ ra ameye kiştene. Coka operasyonê kiştişê al-Bexdadî nameyê aye girewt.

Kurdan bi îstîxbaratê xo destek da

Donald Trumpî qeseykerdişê xo de sipasdarîya xo pêşnîyazê Rûsya, Îraq û Sûrîye kerd. Dima va ke, seba hetkarîya înan, DYA kurdanê Sûrîye rê sipasdar ê. Çîyo ke balkêş o, o yo ke leşkerê DYA Bingeyê Încîrlîkî yê Tirkîya ra ney, la Hewlêr ra kewtî raye. No, raya operasyonî 700km keno dûrî. Încîrlîk Îdlîb ra tena 100km o. Duştê naye de Wezaretê Asayîşî yê Tirkîya Twîtter ser o da zanayene ke operasyon ra 48 saetî verî, her di welatan, yanî DYA û Tirkîya, “melumat û koordînatî” yewbînan de pare kerdî. La henî aseno ke Tirkîya haydara hedefê operasyonî nêbîye û tena warê xo yê hewayî kerd ra.

Wezîrê Asayîşî yê DYA, Mark Esperî, yew roportajo bi kanalê CNN de va ke o nika besenêkeno detayanê operasyonî eşkera bikero ke kamî dest da kamî, la va ke Hêzê Sûrîye yê Demokratîkî (HSD) nê serranê peyênan de hemkarê rindî bîyî û rolê înan muhîm bî û têkilîya DYA înan de nêbirîyaya. Generalê YPG, Mezlum Kobanî, hesabê xo yê Twîtterî de da zanayene ke no operasyon panc aşmî ramit û kurdan bi îstîxbaratê xo dest da amerîkanan ke al-Bexdadî bivînê. Rîyê hêrişê Efrînî ra operasyonê kiştişê serekê DAÎŞ yew aşme pey de erzîya, la peynîye de bi destekê kurdan al-Bexdadî ame dîyene.

Tirêm xebera îstîxbaratê Tirkîya cayê al-Bexdadî ra estbî ya çin bî, na saete de spekulasyon o. La gumanê esto: perso ke pers beno, no yo: tirêm çira leşkerê DYA dizdî ya Încîrlîk ra ney, la bi Hewlêr ra kewtî fealîyet û Tirkîya xeberdar nêkerde?

Tirêm kiştişê al-Bexdadî peynîya DAÎŞ a?

Tirêm kiştişê al-Bexdadî beno peynîya çeteyanê DAÎŞ, hema bellî nîyo. Tayê pisporan ra gore al-Bexdadî muhîm bî, la mezgê rêxistine nêbî. Herçiqas ke kiştişê serek û rîyê DAÎŞ darbeyêda giran a – rêxistine nawo esnayê newe ra organîzekerdişî de bîyêne – ancîya potansîyelê DAÎŞ esto ke newe ra bibo hêzdar. Serekê partîya PDK, Mesûd Barzanî, kî naye de hemfikir o. Yew mesajê xo de Barzanî da zanayene ke kiştişê al-Bexdadî bi rastî zeîfbîyayîşê terorîstan ser o tesîr keno. “Labelê girîng o yo ke bitaybetî komelê mîyandewletî agahdar bibo ke kiştişê Bexdadî nêno manaya peynîameyîşê DAÎŞ û ganî her het hişyar bibo ke şerê verba terorî de hemaheng û berdewam bibo.”

Mezlûm Kobanî kî da zanayene ke semedê kiştişê al-Bexdadî ra beno ke tayê çeteyî nika ro heyfê xo verba kurdan cêrênê. “Hucreyê rakewteyî do heyfê xo seba merdena Bexdadî bicêrê”, Kobanî va. “Her çî mumkin o, hêrişê hepisxaneyan kî.”

CEWAB BIDE

Keremê xo ra şîroveyê xo binuse
Keremê xo ra nameyê xo binuse