Serê aşma teşrîna verêne de Grûba Xebate ya Vateyî ke 1996 ra nat ziwanê kirmanckî (zazakî) standardîze kena, Dîyarbekir de buroyê kerd ra. Merasîmê rakerdişî binê eleqeya şarê kirmancî de vêrd ra, hunermendî û sîyasetmedarî beşdar bîyî. Ma îdarekeranê buroyê Vateyî yê Dîyarbekirî ra Ugur Sermîyanî de qesey kerd. Ugurî ma rê derheqê armanc û hedefê buroyî de melumato muhîm da.

DêrsimInfo (DÎ): Rabîyayîşê ofîsê Vateyî yê Dîyarbekirî xeyrên bo. Ti şîkîna ma rê bi kilmekîye armanc û hedefê nê ofîsî tarîf bikerê?

Verê, seba hêvîya to ya rinde zaf sipas, ma pêrune rê xeyrên bo. Ma wazenîme buroyê Vateyî yê Dîyarbekirî seba wendox, nuştox û sînayoxanê kirmanckî bibo merkezê têhetameyîşî. Kesê ke wazenê bi asanîye biresê kitab û kovaranê Vateyî, wazenê kirmanckî ser o xebate bikerê, eleqedaranê kirmanckî nas bikerê, ê eşkenê buroyê Vateyî yê Dîyarbekirî sey keyeyê xo yê dîyinî bihesibnê. Amancê akerdişê nê buroyî, sînayox, eleqedar û kedkaranê kirmanckîya şîrine mîyan de afernayîşê sînerjî yo.

DÎ: Qerarê rakerdişî key û hetê kamî ra ame dayene?

Qerarê akerdîşê nê buroyî kombîyayîşo hîrisin de, yanî mabênê 23. û 26. kanûna 2018î Dîyarbekir de hetê endamanê Grûba Xebate ya Vateyî ra ame dayene.

DÎ: Seba wendoxanê ke nêzanê, buroyê Vateyî yê Dîyarbekirî kotî yo û key rakerde yo?

Buroyê Vateyî yê Dîyarbekirî kîşta Parkormanî ya hetê nêweşxaneyê Memorîalî der o. Buro do rojanê îne, şeme û yewşemeyî mabênê saetanê 12:00 û 17:00î de rakerde bo. Eke teberê nê rojan de çalakîyêk bibo, ma do hesabê xo yê medyaya sosyale ser a şarê xo haydar bikerîme. Înstagramê ma Vate – Dîyarbekir o. 

DÎ: Seba îstîqbalê buroyî çi plan beno?
Waştena ma a ya ke buroyê Vateyî seba sînayoxanê kirmanckî bibo merkezêk. Reyna wazenîme buroyî de kursê kirmanckî bidîme, grûbanê wendişî bîyarîme pê û çalakîyanê cîya-cîyayanê bi kirmanckî bigîrîme de. Ma bawer kenîme ke bi no qayde sînerjîyo ke ma cor ra qalê ci kerd, do bêro werê.

DÎ: Peynîye de, ti wazena wendoxanê ma rê çîyêk vajê?

Ma wazenîme heme sînayox, eleqedar û kedkarê kirmanckî buroyê Vateyî yê Dîyarbekirî sey yê xo bihesibnê, ci rê wayîr vejîyê, bêrê-şêrê, uca de yewbînî nas bikerîme. Çike seke pîrbabanê ma kî vato “Dare bi lizgan a şanîyena ra.” Ma pîya hîna bihêz îme.

DÎ: Seba ke to wextê xo ma de pare kerd, weş û war be. Keda şima hêçe nêşêro.

Ma kî kedkaranê DersimInfoyî rê zaf sipas kenîme ke şima sîteya xo de ca danê pêro xebat û çalakîyanê bi kirmanckî. Seba terzê şima yê weşanî û profesyonelîya şima, weş û war bê.