Nê rojan mijara medyaya kurdan “serebûtê Trabzonî” yo.

Roja 18. na aşma temmuze de Dûhok ra qasî 60 tenî sey grûbêka turîste wazenê bi organîzasîyonê şîrketêka turîzmî dir bêrê Deryaya Sîyaye. Na grûbe badê ke resena Deryaya Sîyaye, rayberê înan înan beno taxa Uzungolî, Qezaya Çaykara ya Trabzonî. Na grûbe ra qasî 9 kesî wazenê na manzaraya weşe de bi milpêşa ke serê ci de sîmgeya Alaya Kurdîstanî esta, yew resim bigîrê. La şarê na taxe senî ke çim gineno Alaya Kurdîstanî, çimê înan benê sûr û hema benê kefê laserî û ro înan qelewîyenê. Bi paskilan û bi dest û lepan danê nê 9 kesan ro. Wazenê nê kesan lînc bikerê!

Baş o ke cendirmeyî pê hesîyenê û resenê înan û nê 9 kesan lînckerdiş ra xelesnenê. Badê ke înan mehkeme kenê, serdozgerê komare nê 9 kesan sucdar vîneno! Welhasil mesela yena resena walîyê Trabzonî. Walî û serdozgerê komare hîna zaf dişmenî kenê û nê kesan teberê sînorî kenê.

Herçiqas ke berpirsîyarê dewlete seba na mesela xemgînîya xo vanê zî, dewlete dirîtî kena, zûrî kena. Dewlete hetêk ra eç kena, hetêk ra zî maç kena. No serebût serebûtêko newe nîyo. Serebûtê sey nê serebûtan hema-hema her roje yan ma vînenê yan zî şinawenê. Nê serbûtî êdî ma rê normal yenê.

Kurdkî qiseykerdiş beno sebebê kiştişî

Nê serranê peyênan de xaseten zî îqtîdarê AKP ra dima bêtehemulîya kurdan û bêtehemulîya erja kurdan ameya resaya sewîyeya tewr berze. Hem dewlete hem şaro tirk êdî na bêtehemulîya xo bi vatiş û bi fek nêkenê. Hem dewlete hem şaro tirk bêtehemulîya xo êdî rasterast bi gale, bi hêriş kenê. Bi pirodayîş û bi rijnayîşê gonî kenê, bi kiştiş kenê!

Yew kurd, seba sucêko şenik zî, eke bikewo destê polîsan, zaf heqaretî pê kenê. Eke sucê ci sucêko sîyasî bo, o kurd bêîşkence mîyanê destê înan ra nefelîtîyeno. Na mesela de zî nê 9 kesî wexto ke benê emnîyet, polîsî zaf heqaretêko pîl ro înan kenê! Merdim hema-hema her roje beno şahîdê sey nê serebûtan. Kurdkî qiseykerdiş, bi kurdkî deyîrvatiş beno sebebê hêrişî, beno sebebê kiştişî…

Belkî yeno şima vîr, 16. aşma kanûna 2018î de Sakarya Hendek de yew tirk seba ke bi kurdkî qisey kerd, hêrişê yew babî û lajî keno. Babî Kadîr Sakçî (43) mireno, laj Burhan Sakçî (16) birîndar beno. Dewlete bêveng manena! Qatîl veradîyeno. Yew qezaya şenike de babî û laj çarşî de ke bi kurdkî qîsey kerd, babî yeno kiştiş, laj birîndar beno! 29. nîsana 2016 de Uşak de di karkerê înşaatî, seba ke bi kurdkî qisey kerd, şar hêrişê înan keno. Nê her dî kesî, Eren Sonmez (26) û Ufuk Çelîk (28), birîndar benê û merg ra feletîyenê. Sebebê nê serebûtî: karkeran çira bi kurdkî qisey kerdo!

Ez şaş nêbî, çend rojî ver reyna Sakarya de yew eskero kurd, seba ke kurd o, terafê çend eskeranê tirkan ra kuwayîş weno û sereyê xo ra emelîyat beno. Hewce nêkeno ke merdim nimûneyanê winasî rêz kero! Çunke rojî vîyarenê, bê serebûtê sey nê serebûtan nêvîyarenê.

Awanbîyayîş ra nat dewlete dişmentîya xo her firsend de mojnena ra

Eke ewro şaro tirk bêsuc û bêgune hêrişê kurdan keno, se paşta dewleta xo ra keno. Eke dewlete ewro bi çimanê dişmentî nêewnîyêne kurdan ro, ez bawer nêkena şaro tirk dişmentîya kurdan bikero. Eke dişmentî bikero zî, na dişmentî nêameyêne sewîyeya hêrişî û lînçkerdişî. Reyna zî ez vaja, ê ke hêrişê nê turîstan kerd, paşta xo şaye dewlete.

Awanbîyayîşê komare ra nat o, dewleta Tirkîya dişmentîya xo her firsend de mojnena ra. Nika zî na helwesta xo ha dewam kena. Nêzdî 100 serrî yo ke komara dewlete awan bîya. 100 serrî yo ke dewlete derheqê netewa kurdan de yew gamêka şenike zî nêeşta. 100 serrî yo ke kurdî seba ala xo, seba xîret û namûsê xo yo mîlî hepisxaneyanê dewlete ra nêfeletîyenê!

Eke dewlete nêwazena nê hêrîşî bivirazîyê, her kesî ra ver wa dewlete fek zixt û fîtneyanê xo ra verado. Hetê huqûqî ra wa kurd û tirkan sey yewbînî bivîno. Wa muameleyê dewlete her kesî rê eynî bo!