Partîya Azadîya Kurdîstanî (PAK) û komela Şêx Seîdî Dîyarbekir de 29. hezîrane de Şêx Seîd û 48 embazê ey yad kerdî. Yadkerdişo verên saete 11:30 de PAK salona xo de viraşt. Yadkerdişo dîyin zî komela Şêx Seîdî saeta 13:30 de salona “Büyükşehir Belediyesi Kongre Merkezi” de viraşt.

Bê nînan cematê Mustazafan zî meydanê Camîya Girde de yad kerd. Yadkerdişê PAK de qiseykerdox tena Kerem Serhetlî bî. Salone hetanî verê fekî bîbî pirr. Salone xora salonêka şenike bîye. Program zî hende derg û hîra nêbî. Serhetlî bi kurmanckî qisey kerd. Badê qiseykerdişê Serhetlî, çend persî ameyî perskerdiş. Badê ke qiseykerdoxî cewabê nê persan zî da, şaro ke uca de bî, werişt û ro panêlo bîn şî.        

Resim: Mehmûd Nêşite

Programê yadkerdişê komela Şêx Seîdî hîna hîra bî. A salona girde qirpîkî ra bîbî de. Çîyo hîna balkêş hema-hema qasî hûmara camêrdan hende zî hûmara cinîyan bîbî. Panelîstî zî vêşî bîyî: Nîmetullah Erdogmuş (mebusê Rihayî), Prof. Nurettîn Turgay, Ahmet Kaya (şaredarê şaredarîya Erxenî), Rumeysa Gulmez (perwerdekare).

Verê ke panel dest pêbibo, yew mela duayî wendî. Dima serekê komele û tornanê Şêx Seîd Efendî ra Şêx Kasim Firatî derheqê şexsîyetê Şêx Seîdî de malumatêko kilmek pêşkêş kerd. Dengbêjêk zî kilama Şêx Seîdî “Mîrê min, mîrê min” vate.

Eke di tenî kurdî bibê zî, ganî merdim reyna bi kurdkî qisey bikero

Dîwan de moderatorêk, û seke mi va, çar panelîstî bîbî. Goreyê programî, ganî her panelîst des deqîqe qisey bikerdêne. Labelê sebebo ke wext zaf tay bî, heme panelîstî mecbur bîyê ke des deqîqeyî ra vêşî qisey kerdî.

Esas çîyo ke bî sebebê nerazîbîyayîşê meymanan, ziwanê panelîstan bi. Panelîstan ra tena Ahmet Kayayî bi kurmanckî qisey kerd. Ê bînî pêro zî bi tirkî qisey kerd. La badê Nîmetullah Erdogmuşî îtîraf kerd û va: “Gereka ma no panel de bi kurmanckî yan zî bi kirdkî (zazakî) qisey bikerdêne!”

Ahmet Kaya qiseykerdoxo peyên bî. Ey ra ver hîrê panelîstî zî bi tirkî qisey kerdîbî. Wexto ke dora qiseykerdişî ameye Kayayî, ey va: “Eke no cemat de di tenî kurdî bibê zî, ganî merdim reyna bi kurdkî qisey bikero. Çunke panelê Şêx Seîdî de dirust nîyo ke merdim bi tirkî qisey bikero.” Nê vatişî keyfê goşdaritoxan ard. Coka goştaritoxî no vatiş rê çepikî kuwayî.

Badê ke qiseykerdiş qedîya, beşo dîyin dest pêkerd. Beşo dîyin de persî ameyî perskerdiş. Kesê ke persî persayî, pêro zî bi kurdkî (kirdkî yan kurmanckî) persê xo pêşkêş kerdî. Panelîstan zî beşo dîyin de hem cewabê persan bi kurdkî dayî, hem zî qiseykerdişê xo bi kurmanckî pêşkêş kerdî. Panelîstan ra Nîmetullah Erdogmuş zî beşo dîyin de bi kirdkî (zazakî) qisey kerd.