Destê Edîtorî ra:

Weçînitişê Îstanbulî rê di rojî ke mendî, xafil de mektuba sekreterê pêroyî yê PKK, Abdullah Ocalanî, neşr bîye. Tede Ocalan vano ke ganî HDP, sey verî, bêteref bimano. Labelê HDP stratejîya xo nêvurnena.

Avûkatanê Ocalanî, buroyê huqûqî yê Asrinî, detayê pêvînayîşê xo yo ke 18. hezîrane Îmrali de ca girewt, neşr kerdî. Vilaweka xo de avûkatan nîya qisey kerd: “18. hezîrane 2019 de ma muwekîlê xo, birêz Abdullah Ocalanî de, hepisxaneyê girawa Îmralî de ameyîme têlewe. Sey pêvînayîşanê bînan, birêz Ocalanî na fay kî xeylê babetî ercnayî. Nê babetî bi kilmekî nê yê: grevê vêşanîye, têkilîyê kurd û tirkan, tarîx, nasname û kulturê kurdan, halê Sûrîye û vakurê Sûrîye, îtîfaqo demokratîko sîyasî û usûlê ci û sîyasetê Tirkîya yo rojane.”

Ma not bikerîme ke wendena mektube bi xo meselê bîye. Pêvînayîş 18. hezîrane de qewimîya. A roje Ocalanî mektube dabîye avûkatanê xo, la înan mektube nêweşanaye. Henî aseno ke Ocalanî ancî waşt ke mektube bivejîyo, coka pê Alî Kemal Ozcanî (mazgêrdij o, unîversîteya Mizurî de serekê beşê sosyolojî yo) daye wendene. Wendena Ozcanî ra dime avûkatan mecburî bi xo vilaweke daye û muhtawaya mektube ercnaye. Tede Ocalan giranî dano ser ke HDP “raya hîrêyin” a. Îtîfaqo demokratîk o ke HDP de xo îfade keno, goreyê vatena Ocalanî “seke heta nika kerdo, ganî weçînitişan de bêterefîya xo ser o vindo”.

Merdimo ke na mektube biwano, mesajê ci beno eşkera: ganî HDP no weçînitiş de bêteref bimano. Çi esto ke tayê HDPij û tirkanê çepgiran qeseyê Ocalanî goreyê rojeva xo wanenê û şîrove kenê. Înan gore no mesaj yeno ra a mana ke “HDP raya xo ra şêro”. Coka sermîyanîya HDP da zanayene ke ê stratejîya xo nêvurnenê – yanî raya xo danê CHP. Hetta tayê sîyasetmedarê HDP Twîtter ser o nusenê ke ê yê raya xo bidê Îmamogluyî.

Çîyo ke Ocalan tîya vano, xelet nîyo. Demo derg de ganî HDP xo sîyasetê tirkan ra peyser bianco û raya hîrêyine bibo, yanî raya kurdan û Kurdîstanî. Coka stratejîya HDP ya nikayine pê na raya hîrêyine nêkena. Beno ke HDP wazena mexlûbîyeto ke weçînitişê adare de herêmanê Kurdîstanî de dî, ey bi weçînitişê Îstanbulî reyna weş bikero. Çi beno wa bibo, henî aseno ke projeya HDP – ke tim sey fikrê Ocalanî name bîye – destê Ocalanî ra vejîyaye û nika hetê sîyasetê çepgiranê tirkan ra îdare bena. Çîyo ke seba înan ewro muhîm o hurênayîşê hukmat û muxalefetî û sîyasetê tirkan o. Kurdîstan kî rolo dîyin ya kî hîrêyin girewt.

Xo vîr ra mekerîme: weçînitişê Îstanbulî senî vêreno ra wa ravêro, kurdan rê ferq nêkeno. Herçiqas ke partîyê tirkî xo mîyan de hurê nê, weçînitiş ra dime reyna benê aşt û eke wext ame, têde pîya kurdan kenê hedefê xo. Çi heyf û ecêb o ke partîyêda kurdan (!) xo werteyê munaqeşeyanê “tirêm kamcîn tirk beno serekê şaredarîya Îstanbulî” de vînena. Xo ra no pers pers bikerê: weçînitişê Îstanbulî çiqas muhîm o? Meseleyê bînî se bîyî? Efrîn, dêsê sînorî, vîndîbîyayîşê ziwan û zagonê ma? Nê meseleyî dahîna muhîm nîyê? Heto bîn ra Îstanbul de 3-4 mîlyon kurdî estê. Ganî ê yew hêz de organîze bibê û heqanê xo bicêrê.

Merdimo ke partîyanê kurdan ê verênan de nîyado, êyê ke HDP ra ver ameyî û ewro bîyê parçeyê ci, vano qey Kurdîstanê Vakurî êndî kewt destê çepgiranê tirkan. Ma ke baldar nêbîme, sîyasetê welatê ma hetê kemalîst, tirkperest û tirkîyaperestan ra îdare beno. Mezgê HDP êndî kurd nîyo, labelê bi kadroyanê biaqilan merdim besekeno ney bivurno. Ganî HDP nêbo rehîneya înanê ke eleqeya xo bi cu û nasnameyê kurdan çin a. Tena bi “bijî-bijî”yan û kewtişê govende sîyaset nêbeno. Ganî sîyasetê kurdan de ruhê kirmancîye estbo.

Yewna çîyo muhîm o ke zereyê mektuba Ocalanî de zêde eleqe nêgirewte, qeseyê peyênî bîyî. Ocalan vano ke “kulturê kurdan bi hewayêde rast nêno musnayene û ciwîyayene. Kurdê ewroyî domananê xo rê kurdkî nêmusnenê, no hal halêde xofdar o.” Na rewşe sîyasetê vakurî de problemêde girs o. Kurdê Kurdîstanê vakurî pede-pede ziwanê xo kenê vîndî. Ganî na mesele rojeve de bêro virênîye. Senî beno ke sermîyanîya partîya kurdan de qiseykerdoxê kurdkî eqalîyet ê? Înan kî caverdê, çend domanê sîyasetmedaranê HDP ziwanê xo yê dayîke zanenê û qisey kenê? Kurdbîyayîş, kirmancîye, cuya rojane de xo musnena. Ganî sîyasetê kurdan kî henî bo.

CEWAB BIDE

Keremê xo ra şîroveyê xo binuse
Keremê xo ra nameyê xo binuse