Marîa Şarapova prensesa newî ya tenîsî ya. Urisa rindeke kayo peyên ê turnuvayê “French Open”î bêqusur bi skorê 6:3 û 6:2 duştê Sara Erranîserwa de qedêna. 25serrîya xo de bi no serkewtiş karîyerê xo de Australîan Open, Wîmbledon û US Open ra dime Roland Garros de xelata yewine girewte.
Topo peyên de Şarapova serê hardî de çok na ro, hermeyê xo kerdî hewa, xil bîye payanê xo ser o û xeylê sanîyeyî keyf ra reqişîya. Bi serkewtişê Parîsî ra Şarapova lîsteyê tenîs de cayo yewin girewt.
Şarapova maç ra tepîya hîsê xo nîya îzeh kerd, “Ez zaf şa bena, labelê maç seba mi henî rehet nêbî. Sara kayêde rindek kay kerd.” Persê rojnamegerî ser o ke Şarapova no serkewtiş emşo çitur bimbarek kena, Şarapova bi huyayîş nîya cewab da: “Oh yeah!”
Marîa Şarapova Rûsya de ameya dinya, 25 serrî der a, 188sm derg a û 55 kg giran a. Şarapova 4serrîya xo ra bi nat tenîs kay kena.
Merdiman de Rafael Nadalî kayo peyên de duştê sirbî Novak Djokovîcî de kewt ser û nameyê xo rîpelê tarîx de qeyd kerd. Peynîya setî 6:4, 6:3, 2:6 û 7:5 duştê no. 1 yê dinya Nadal xelata xoya 7. şaristanê Parîsî turnuvayê Roland Garrosî de kerd destê xo. Bi no serkewtiş Nadalî esfsanayê Tenîs Bjorn Borgî peyê xo de verda.
