Taximê Swêdî yo kurd Dalkurd FF vejîya lîga yewine. Hîkayeya taximî sey sanike wanîyena. Zemanê, pirtikê mendbîye ke na sanike biameyêne peynîya xo.
Cayo ke Dalkurd ci ra yeno, şaristanê Börlange yê Swêdî yo ke tede da-40.000 merdimî ciwîyenê. Börlange şaristano tewr girs yê hêrema Dalarna yo. Herçiqas ke tîya de endustrîya asinî bibo kî, hetê metroyî ra cayo girîng bibo kî, naye ra dot zaf çî hêvî nêdano – dêso sûr o ke dormeyê stadyumê Dalkurdî de çerx gêno, o kî nêbereqîyeno – la hîkayeya ke Börlange de nusîyena, manena ro sanika futbolî.
Sanika ma 28.10.2017 de dest kena ci, çar deqayî mendî saeta çarine rê. Dêsê sûrî ra qîrayîşî benê berz. Taximê Dalkurdî yo ke serra 2004 de awan bîyo, emser do tarîxê xo de reya verêne lîga Swêdî ya tewr berze de kay bikero. Taximo ke verê cû sey taximo cayî virazîyabî, ewro her kuncê Swêdî de zanîyeno. La na sanike kotî, çitur dest kerd ci?
Dal + kurd
Nameyê taximî ra eşkera beno ke Dalkurd hetê kurdan ra seba kurdan ameyo ronayene. Dal kilmnuşteyê nameyê hêremê Dalarna yo. A kî armaya taximî de asena: Alaya Rengine, kesk û sûr û zerd ser o di estorî, sembole hêreme, sereyê xo kenê berz.
Destpêkê serra 2000 de problemêde Borlänge estbî, ê wextan hûmara cêncanê sucdaran goreyê bajaranê bînan ê Swêdî zêde bîye. Hûmara krîmînalîte û hûmara koçberanê kurdan kî yewbînî de girêdayî bîyê. Koçberê kurdî yê ke cengan ra remayê ameyê Swêd xo uca de nabîyî ro, tim sey xo mîyan de mendê, dewlete rê adapte nêbîyê.
Wexto ke sebebê bêdîsîplînbîyayîşî ra yew grûba futbolbazanê kurdanê cêncan hetê taximê tewr namdarî yê şaristanî ra ameyî teber eştene, keyeyanê kurdan de protesto qewimîya. Va, nîya nêbeno. Va, ma êndî hurendîya xo de ronênişenîme, ma ke hurendîya xo ra nêlewîyîme, cêncî verê çimanê ma de raye ra vejîyenê. “Pîyê mi ke no halê cêncanê kurdanê Borlänge dî, waşt ke virênîye ro ci bicêro, tedbîran bicêro. O taw no teyna futbol ser o bîyêne”, Adîl Kizil roportajê rojnameyê Dagens Nyheterî de ano xo vîrî. Adîl Kizil o ke taximê Dalkurdî destpêk ra bi nat nas keno, sifte bi xo kelevan bî û nika sermîyanîya sporî keno. O çapemenîye rê bi îftixar derheqê Dalkurdî de qisey keno.
Wexto ke taxim awan bîbî, kesî bawer nêkerd ke rojê tewrê lîgê 1. beno. Pîyê Adîlî û serekê klubî, Remazan Kizilî, o taw teyna waşt ke perspektîf û îmkan bido ê cêncanê ke wextê xo tal ra vîyarnabî. Ekîbe ronîyaye. Her ke şî, futbolbazan hîna weş kay kerd û xo rê raya newîye kerde ra. Feqet futbolbazî kêmî bîyî, coka Adîl Kizilo ke o wext taximê IK Brage de seba lîga dîyine heq girewtbî, qerar da û taximê xo vurna, şî transferê Dalkurdî bî.
“Sereko ke lajê xo taximêde bîn de kay keno, senî futbolbazanê neweyan bîyaro taximê xo? No semed ra mi kî qerar da û ez ameya Dalkurd”, Adîl vano. Adîl ke tranfer bî, desinde nas û dostê xo xeberdar kerdî ke bibê endam. Zafane kurdî bîyî. Peyni de taxim virazîya.
Sanika Futbolî
Lîga tewr nizme, lîga heştine de, Dalkurdî dest kerd ci. 2015 ra mabênê panc serran de, serre bi serre vejîya lîgêna, heta ke reşt lîga hîrêyine.
“Ma sey taximanê bînan hewte de teyna yew ya kî di rey antreman nêkerdêne, ma rojê de tewr şenik di saetî gude dima vaştêne”, sereko mêrdinij Remazan Kizil vano. Dalkurd şeş serrî lîga hîrêyine de mend, serra 2015 ra apey kî lîga dîyine de di serrî kay kerd. Di serran ra dima serkewtena tewr girse ameye: taxim beşdarê lîga Swêdî ya tewr berze beno.
Felaketo girs ra xelesîyayê
Hebikê mendî ke hewnê taximî bibîyêne trajedîya bêdermane: tarîxê 25.03.2015 de klubê Dalkurdî dest de bîletê teyaraya Germanwings 9525 bîyî. A teyara ke bi waştena pîlotî qeza kerdbîye, ke ci ra kes ranêxelesîya. Bextê xortan bî ke dekewtiş ra ver sermîyanîya taximî deqaya peyêne de qerar girewt ke teyara bivurno, çike Almanya de neqlo çend saetan estbî. Adîl Kizilo ke derheqê nê serebûtî de qisey keno, ewro hîna zerrîya xo kena çîk.
Taximê Kurdan o Neteweyî
Ewro nameyê taximî fekê her kesî der o. Swêd û Borlänge de, her ke şî, terefgirê Dalkurdî benê zêde. Seba ke IK Brage kî kewta lîga hîrêyine, Dalkurd hîna zaf bala merdiman anceno.
Labelê ruhê taximî teyna name û alaya ci nîyê. Ruhê taximî terefgirê ey ê. Ewro hîna teyna dorê 2.000 seyrkerdoxî yenê maçanê Dalkurdî û no taw teyna yew futbolbazo esilkurd rêzkerdişê taximî de kay keno (di kurdê bînî cîgir ê), labelê ancîya Adil Kizil ano ziwan ke her leteyê Kurdîstanî de pêro kurdî nameyê Dalkurdî zanenê. Facebook ser o kî 1,5 mîlyonan ra zêde ecibnayoxê Dalkurdî estê. Zerrîya xo de Dalkurd tim taximêde kurd bî û hîna henî yo. Rojnameyê Aftonbladetî nuseno: “Nika taximê 37 mîlyon kurdan lîga Allsvenskanî der o. Senî ke F.C. Barcelona sey taximo neteweyî yê katalonijan name bena, Dalkurd kî sey taximê neteweyî yê kurdan name beno.”
Rasta ci, Dalkurd wazeno rêça Barcelona de şêro û şarî rê teyna klubê futbolî ney, la zêde bibo. Kalevan Frank Pettersonî derheqê na mesele de nîya vano: “Ez ke serra 2010 de ameya tîya, tayê taximê bînî ke lîga dîyine de mucadele kenê, waşt ke ez taximanê înan de kay bikerî, la mi reyê tîya de antremanê provayî kerd, o ra dime mi ra gore taximo bîn nêmend, çike merdimê taximî tîya de teyna futbolî kay nêkenê ya kî teyna sermîyanîya taximî nêkenê, ê şonê rêxistinan virazenê û şaristan de cêncan rê muhîmîya mekteb û dersan musnenê.”
Dalkurd gureyê ciwanan de ceribneno ke sey taximê kurdan bêro nas kerdene. Peşraw Azîzî, kaykerdoxê defansî yo silêmanij, The Guardian ra vano: “Kurdîstan de milet ya Real Madrîd rê ya Barcelona rê ya kî Dalkurdî rê destek danê.” Kaptanê Dalkurdî 12serrîya xo de welatê xo ra bar kerdbî ameyo Swêd, la hîna girêdayeyê Kurdîstanî yo. Erdlerzo ke serra 2011 de Wan de bî, ey ra dima Dalkurd taximê namdaranê Swêdî de kay kerd ke pereyan arê bido û birusno şarê Wanî. Wexto ke welat binê hêrîşê DAÎŞ de bî, Peşrawî seba newe ra viraştişê şaristanê Silêmanî bi ereq û keda xo piştgirî organîze kerde.
Lîga şampîyonan?
“Ma ke taximê xo Lîga Şampîyonan de bivînîme, tabî kî ma pê zaf keyfweş benîme“, Sarkat Juandî, karsazêde kurd ke sermîyanîye de gureyeno, rojnameyan ra va. Remazan Kizil kî bi keyfweşîye vano: “Ma ke rojê Lîga Şampîyonan de duştê Fenerbahçe û Galatasarayî de kay bikerîme, na bena hîkayeya dinya ya tewr rindeke. Bi alaya Kurdîstanî sêneyan ser o duştê înan de futbol kay kerdene, no xeyalê min o tewr girs o. Heta ke mi no nêdî, ez nê karî nêverdana.“ Eke a roje yena, stado girsêr lazim beno.
