Merasîmê “Ḳalê Gaẍanî” yo ke asma gaẍanî de yeno bimbarekkerdene, Dêrsim Mamekîye de hetê Akademîya Mizûrî ra ame organîzekerdene. Ḳalkek û Fate ebe def û zirna merkezê Mamekîye ra be kay û kêf cêrayî, sarî ra loqmeyî dayî arê û tepîya verê Meydanê Sey Rizayî de loqmeyî kerdî vila ke serra newîye bimbarek kerê.
Uza de derheqa gaẍanî de tayê melumat û gulbang ame dayene. Ocaẍa Kurêsû ra Kadîr Bulutî qesey kerd va ke gaẍan urf û edetê Dêrsimî yo ḳan o, tradîsyonê hezar serrûn o. “Gaẍan par ra xatirwaşten a, serra newîye rê selamdayen a. Waxto ke vanê gaẍan o, o waxt ma wazenîme ke çêyanê ma de, kuçanê ma de û ocaẍanê ma de serra newîye ma rê xêr, bereket û weşîye bîyaro.”
