Bizê ḳirrî, ya kî ebe namo bîn pezkovî, malê kovî û malê Xizirî, Dêrsim de heywanê bimbarek ê. Seydkerdena dînan tomet a. Çi esto ke heşto verên dewa Askireg a Pirdê Sûrî yê Pilemurîye de di bizê ḳirrî hetê seydwanan ra ameyî kîştene. Vizêr kî dewa Pulurî Kozluca de juna biza ḳirre ebe hewayêde îlegal ame kîştene.
Enformasyonan ra gore di seydwananê spanyolan bizê ḳirrî kîştî. Dêrsimijî pê kîştena malê Xizirî rajî nêbîyî û cendirme de gerreyê seydwanan kerd. Yeno waştene ke seydê bizanê ḳirran bêro qedexekerdene. Dêrsim de aktîvîstanê xozayî (tebîetî) yenê têlewe ke çalakîya protestoyî virazê.
Rozanekerdîs: Melumatê ajansê PÎRHA ra gore cendirman seydwanî pêgirewtî, hîrê kesan rê ceza 30.000 TL dê.
Malo peskovî yê Xizirî nîyo, yê Sa Heyderî yo!
Sa Heyderî ke pîyê xo Kurês dîyo, sermayo, malê xo caverdo, hîre gamî de resto bi gilê Kemerê bimbarekî… Kemerê bimbarek de mekan gûreto, namê xo bîyo Duzgin. O malo ke caverdo, o kî bîyo malo peskovî, coka jarge wo!
Yê Xizirî, malo xo çîno, se ke çe/mekanê Xizirî serê derya der o!