Seke zaf kesî zanê, ma -Grûba Xebate ya Vateyî- kombîyayîşê xo yê 33. roja 26.02.2020î saeta 12:00 de qedêna. Nê kombîyayîşî 23. aşma sibate saeta 9:00î de dest pêkerdbî.
Gama ke ma saeta 9:00î de kom bîyî, ma zanayêne ma nê kombîyayîşî de se kenê. Çunke her kombîyayîşî de roja peyêne de ma babeta kombîyayîşê ameyoxî ser o vindenî. La sey prensîbî, verê ke ma dest bi xebate bikerê, ma reyna rojeva kombîyayîşî û programê çar rojan tesbît kerd. Rojeva ma de reyna “termê beledîya” û çend çekuyê ke hetanî nika ma kerdbîyî programê xo, la ma nêmcet verdabîyî, estbîyî. Pêro pîya nêzdîyê 600 term û çekuyan ser o ma xebitîyayî.
Roja 26. aşma sibate saeta 12:00î de gama ke kombîyayîş qedîya, hema-hema ma pêro endaman zerrî ra vat “ox!”
Çunke tîya ra panc serrî verê cû seba ke beledîyayan rê lazim bîyî, biqasî hîrê hezarî termî amebîyî tesbîtkerdene. Ma kombîyayîşê xo yê vîst û newinî de dest bi xebata termanê beledîyayan kerd. A roje ra nata panc kombîyayîş o ke ma termanê beledîyayan”ser o şixulîyenê. Bi serfirazî û bi rîyêko şite ma binê nê barê mîletê xo ra vejîyayî.
Termî giran bîyî. Xebate waştêne, zor û zehmetî waştêne, cigêrayîş waştêne. Ez bi xo zanena û şahîd a ke sere de Malmîsanij û tayê embazanê bînan çi ant û çi nêant! Ma sey heme kombîyayîşanê bînan, nê kombîyayîşî de zî babeta kombîyayîşê 34. tarîx û cayê ci tesbît kerd.
Vanê, xebere xebere ana! Seba ke mi cor ra behsê nê terman kerd û mi behsê zor û zehmetîya înan kerd, ez wazena tîya de nê terman ra çend nimûneyan binusî.
Kombîyayîşê vîst û newinî ra:
İleri biyolojik atık su arıtma tesisi: sazgehê awguznayîşê gendawe yo bîyolojîko aver”
Ön çökeltme ünitesi: “yewîya denişnayîşê verênî”
Elektromanyetik debimetre: “debîmetreyo elektromanyetîk”
Kombîyayîşê hîrisinî ra:
Gaz dezenfektan: “tehfîlkero gazin, dezenfektekero gazin”
Mikrosefali: “sereqijîye, sereqijî, mîkrosefalî”
Zihinsel öğrenme yetersizliği: “nebesîya banderbîyayîşê zihnî, nebesîya musayîşê mentalî”
Kombîyayîşê hîris û yewinî ra:
İnsan kaynakları daire başkanlığı: “serekîya dayîreyê çimeyanê merdiman”
Kaynak geliştirme daire başkanlığı: “serekîya dayîreyê xurtkerdişê çimeyan”
Proje insan kaynakları yönetimi: “mudirîya çimeyanê merdiman yê projeyî”
Yerel ekonomiyi güçlendirme daire başkanlığı: “serekîya dayîreyê hêzdarkerdişî yê ekonomîya herêmî”
