“TUYAP” Dîyarbekir de “Fuara Kitaban” ê hîrêyin akerd. Fuar 22ê na aşme de abi. Sedemê ke roja yewine bî hende kes çinê bî.

Roja yewine bo zî akerdiş goreyê programê xo virazîya. Saete 11.00 programê akerdişî vîrazîya. Programê akerdişî ra dima programê panel û konferansan dest pêkerd. Sey her serran hetêk ra programê panêlan hetêk ra zî rotişê kitaban virazîya.

Ewro çend panelê muhîmî virazîyê. Nê panelî pêro zî derheqê ziwan û edebîyatê kurdan ser o bî. Panelêk tera derheqê edebîyat û şîîrê kurdan bî. Panelîstê nê panelî yew tera Başur ra Namiq Hewramî bi û yew tera zî cinîya ey bî.

Yew panel zî hetê “Sodep”î ra virazîya. Babeta nê panelî sîyasî bî. Panelî Ercan Karakaş îdare kerd. Prf Ahmet Ozer û Serekê Baroyî yê Dîyarbekirî M.Emîn Aktarli zî panelîstî bî.

Verê Ahmet Ozerî qal kerd. Ahmet Ozerî va: “Şarê rojawanê Tirkîya heşar nîyê. Meselaya kurdan nêzanê. Fehm zî nêkenê. Dewlete goreyê îdeolojîya xo ya fermî meseleya kurdan înan rê îzeh kena. No şargoş dano dewlete û dewlete ra bawer keno. Labelê tayê tera zî mesela baş fehm kenê. Nê kesî zî destê xo nênanê vijdanê xo ser û goreyê bawerîya xo qal nêkenê”. Dewamê qalanê xo kerd û va: “Kurdî û Tirkî tarîx de hewt rey amey têvera. 1) 1071 de Malazgîrt de, 2)çaldiran de 3) Îstanbul de wexto ke Îatanbul bi Merkezê Osmanîyan, 4) Dewrê Ebdul hamîdî de wextê “Hemîdîye Alaylarî” de, 5) Dewrê Mustafa Kemalî de, 6) 1968 de wexto ke şorişgêrê tirkan û yê kurdan cêra bî, 7) na çatrayîre de zî îktîdarê AKP”.

Ahmet Ozerî ra dima M. Emîn Aktarli dest bi qalan kerd. Ey va: “Hetanî ewro kurdan qala cîyayîşî nêkerda. La nika ra pey ganî kurdî qala cîyayîşî zî bikerî. Çunke na dewlete zafane zî hukumata Akp yî xebere ra fehm nêkena. Kurdan hetanî ewro bi tirkan rey de ciwîyayîş waşta, behsa cîya ciwiyayîşî nêkerda. La ewro eke behsa cîya ciwîyayîşî bikerê neheq nîyê.”
Beşdarî na qale ra çepikan kuwa û panel qedîya.

( Mehmûd Nêşite – DI)