Serekê Kurdîstanê Başûrî Mesûd Barzanî çar rojan ra Fransa der o. Fransa waştişê xo da zanayene ke bi (ebe) Kurdîstanê Başûrî bazirganî û projeyanê nêmedaran bizêdno. Roja 15.06.2010 de wezîrê karanê teberî yê Fransa Bernard Koucnerî û Barzanî pîya yew (ju) konferansê çapemenîye kerd. Uca (uza) de peyê înan de alaya Fransa û Kurdîstan ronîyaye bî.

Bernard Kouchnerî va ke “No zîyaretê Barzan Begî têkilîya Fransa û Kurdistanî ano rayêda newîye. Ma wazenîme ke bi yew kontrat sektoranê teknolojî, endustrî, weşîye û perwerdeyî de pîya bigureyîme.” Kouchner Barzanî rê vat ke Barzanî Fransa de sey (jê) çêyê (keyeyê) xo de bo.

Barzanî kî qeseyê xo de ard ziwan (zon) ke “Fransa dewrêde zor de dest da ma, şima weş û war bê. Xeylê çîyan de ma serranê ke verê ma de ê, pîya gureyîme.”

Serekkomarê Fransa Nîcolas Sarkozy bitaybetî Barzanî silayîya Fransa kerdîbî. Barzanî bi Sarkozy ra roja sêşeme, 15.06.2010, ameybî têlewe. Verê ra Barzanî şîbî welatê Tirkîya.