Lîgê Spanya de kayê “El Clasico” (klasîk) fikrê zafê heyrananê futbolî ra gore maçêde tewr heyecanin o. Vizêr, roja 23.03.2014 de, merdimî bêguman kayêde nîyanên dî. Di ekîbanê favorî yê Spanya, FC Barcelona û Real Madrîd duştê yewbînan de çîp kay kerd. Maço ecêb bi 4:3 xelisîya.

Sayeya Lîonel Messî ra ekîbê Barcelona el clasîcoyo 227. xo rê girewt. Pêro maç de hewt golî û hîrê penaltîyî erzîyay, hewt kartê çeqerî û yew karta sûre kî ancîyay. Herçiqas ke Real Madrîdî heta a roje 31 maçî bi serfirazîye qedênaybî û herçiqas ke destpêk de maç 2:1 û 3:2 seba Real bî, ancîya ekîbê qiralan sey 26. oktobra parî duştê Barçayî de kewt bin.

Serebûto tewr tesîrdar o bî ke defans ra Sergîo Ramosî leteyo dîyin de semedê vindernayîşê Neymarî ra karta sûre dîye. Messî ke heta a game maç kerdîbî 2:2, şanşê penaltî xo rê xebitna û golê 3:3 eşt. Heta a karta sûre Real raver bî, bitaybetî futbolbazo fransiz Karîm Benzema kontrolê Barça ra vejîyayêne. Seba Benzemayî golanê xo yê 1:1 (dq. 20.) û 2:1 (dq. 24) ra teberxeylê şanşê bînî yê goleştişî estbîy. La ya kalevanê Barcaleno Vîctor Valdesî gudî pêgirewtî, ya kî defans ra Gerard Pîrqueyî o vinderna. Karta sûr a Ramosî ra tepîya, Benzema kî Raphael Varaneyî ver a ame vurnayene.

Bi penaltîya dîyine kî Messî deqa 84. de netîceyê maçî hema-hema bellî kerd. Chrîstîano Ronaldoyî na fay zêde kar nêkerd – o kî binê kontrolê çîpî yê defansê Barça de mend. Tena yew penaltîya Alvesî (ke xeletîya hekimî ra ameye dayene, çike foul teberê warê ceza de bî) seba Ronaldoyî gureyaye, ey golo xo yê 26. eşt. Çi esto ke duştê Messî de Ronaldo bêqewet asa.

Bi no netîce reqabetê şampîyonîye yê lîgê Primera Divisionî bîyo hîna çetin. Bi 70 pûanan Real hîna ver der o, labelê nika bi reqibê xo Atletîco Madrîd (ke duştê Sevîlla de 2:0 kewt ser) têduşt o. Barcelona kî bi 69 pûanî cayo hîrêyin de çimê Realî de vindena.

1 ŞÎROVE

  1. Ez beseker ne ke qayite na maç bikerine, zaf maçe de rindek bi. Di hetîk hata araqê peyenê xo kay kerd û tepîya Messî hunerê û sebrê xo rind musna û na maç çarna hete xo. Sermayenê Dersiminfo vîdoyoke sima corde kerdo keyepelê negureyeno

Comments are closed.