Serekwezîrê Komara Tirkîya, Recep Tayyîp Erdoganî, qiseykerdişê xo de va ke “Ma do kokê Twîtterî bîyarîme”, dima Tirkîya de Twîtter ame qedexe kerdene.

Qiseykerdişê Erdoganî ra çar saetî dima, medyaya sosyale Twîtter bi qerarê mehkeme ameye qedexe kerdene. Naye ra gore zerekewtişê Twîtterî Tirkîya ra êdî mumkin nîyo. Qerarê mehkeme de ame dayene zanayene ke semedê xeylê gerreyanê şarî û dewayan ra keyepel ame qedexe kerdene.

Qedexekerdişê Twîtterî Tirkîya û çapemenîya dinya de xeylê rexneyî dîy. Tirkîya de Twîtter zaf populer o: xebitnayoxanê Înternetî ra her hîrêyin Twîtter ser o yo, yanî 11 mîlyonî kesî.