Goreyê Komîsyonê Qayîtkerdişê Peyserantişî yê ÎHD ra, Kurdîstan de yew serre de 341 qereqolê neweyî yenê viraştene, 2 hezarî kadroyê qorîcîyan kî amey girewtene. Aye ra kî dot sîndoran de 11 barajê asayîşî yê neweyî û 820km “rayê asayîşî” virazîyay.
Komela Heqanê Merdiman ÎHD ke yew serre ra ver komîsyonê xo seba qayîtkerdişê prosesê peyserantişê hêzanê gerîlla û leşkeranê Tirkîya nabî ro, raporê xo yê yew serre kerd hazir. Raporo ke prosesê aştîye analîz keno, tede yeno vatene ke hema-hema zafêrîya gerîlla heta êlula 2013 peyser ancîya, labelê seba ke hukmat sozê xo de nêvindet, gerîlla hereketê peyserantişî ancîya vindernayo.
Goreyê cigêrayîşê ÎHD, yew serre de Kurdîstan de viraştişê 341 qereqolanê neweyan îhale bî. Nê qereqolan ra 102 teneyî virazîyay, 143 hîna awanîye der ê, 36 qereqolî kî hîna îhale benê. Sîndorê Şirnex û Kurdîstanê Başûrî de binê nameyê “barajê asayîşî” de 11 barajî yenê viraştene. Dêrsim de kî Newala Mizurî de çar barajê asayîşî awanîye der ê, yewê kî Çemîşgezek de virazîno. Botan û Sêrt de çeman ser o kî barajî yenê viraştene.
Yew projeyê dewleta Tirkîya kî bi nameyê “rayê asayîşî” esto: nîya sîndorê Kurdîstanê Başûrî de bi dergîya 820 km yew “raya asayîşî” ameye viraştene. Prosesê peyserantişê hêzanê çekdaran de kî zêdîyayîşê hêzanê qorîcîyan ê dewlete dewam kerd. Şirnek, Wan, Bidlîs, Sêrt, Çewlîg û Mûş de pêro pîya dorê 2.000 kadroyê qorîcîyan ê neweyî amey rakerdene. Qisimêde nê kadroyan kî wezîfe der ê.
