Reya dîyin a ke kurdê başûrî nê hewt aşmanê peyênan de kewtî weçînitiş. Peyê aşma nîsane de Îraq de weçînitişê parlamentoyî û weçînitişê cayî (mehelî) ameybî viraştene. Herçiqas ke netîceyo resmî hîna peynîya gulane de do neşr bibo, netîceyo nikayin vejîyayîşê partîyan bellî keno.

Herêma Kurdîstanî de panc partîyê girsî cayanê cîya-cîyayan ê Kurdîstanê Başûrî de kewtî weçînitiş. Hewlêr de Partîya Demokrat a Kurdîstanî (PDK) bi 50,9 % zafêrîya rayan girewte, Yewîya Niştimanî ya Kurdîstanî (YNK) bi 22,42 % dîyine ameye, cayo hîrêyin kî partîya Gorranî rê mend (14,41 %). Duhok de kî PDK bi 72,7 % weçînitiş xo rê girewt, uca de Partîya Yewîya Îslamî (Yekgirtû) bi 13,1 % dîyin ameye. Silêmanî de PDK bi 10,65 % YNK (31,36 %) û Gorran (43,29 %) ra dime mende. Kurdîstanê Başûrî de pêro pîya 1.919.284 kesî şîy sindoqan ser.

Partîya Gorranî ke xo sey partîyêda reformîstî îfade kena, serra 2009 de YNK ra cîya bîye û weçînitişê parlamentoyê Kurdîstanî êlula 2013 de YNK ra zêde rayî girewtîbî. Hîna merkezê Gorranî Silêmanî ya. Yekgirtû û Komelê Îslamî (Komal) no taw kî beşdarê weçînitişî bîy. Yekgirtû Silêmanî de hîna besekerd ke rayan bicêrê, tenê kî Duhok de. La Komal hîna zaf Hewlêr de serkewte bî.

No weçînitiş weçînitişê parlamentoyê Kurdîstanî ra cîya r’ o, labelê çi esto ke partîyê kurdî netîceyê weçînitişê cayî yê Îraqî sey nîşanê weçînitişê îstîqbalî vînenê. Parlamentoyê Îraqî de kurdî hîna ceribnenê ke herêmanê Kerkûk û Sîrwanî bikerê parçeyê Kurdîstanî.

2 ŞÎROVEYÎ

CEWAB BIDE

Keremê xo ra şîroveyê xo binuse
Keremê xo ra nameyê xo binuse