Kaybazê dêrsimijî yê tîyatroyê kirmanckî Tekîn Agacikî roportajê xo de bi rojnameyê Yeni Özgür Politika de derheqê hunerê kirmanckî de qisey kerd.

Tekîn Agacik no taw Atolyeyê Seyrî Meselî de kayê xo yê kirmanckî “No wo ke werte de, ez û ha” musneno. Agacikî serra 2004 de dest eşt karê tîyatroyê kirmanckî û na raya çetine de hunerê xo ra dewam keno û stand-upê jukek ê kirmanckî virazeno.

Performansê ey ê stand-upî de heyatê şarî cayê xo cêno. Naye ra teber kî rexneyê sîyasetî û durumê komedîtrajîk ê heyatê Agacikî benê mewzû. “Ge-gane mi rê tayê çepgiran vatêne ke qiseykerdişê kirmanckî kanperest o. Ez naye rê zaf huyayêne. No kî mi kerd zereyê kayî. ‘Kamcîn kitabê Marx ya kî Lenînî de nusîno ke enternasyonalîst filan ya kê bêvan zon (ziwan) qisey bikero?’ Ma ke fek kirmanckî qiseykerdiş ra veradîme, ma dinya bena cayêde tenêna huzurin?”

Eleqeya şarî bi karê Agacikî girs o. Feqet ey ra gore problemo tewr girs dîyayîş cayê kombîyayîşî û organîzkerdiş o. Agacikî da zanayene ke hunermendîye bi zono (ziwano) ke beno vîndî, zaf zor a. “Hetê ra gerek ke merdim (mordem) weşîya xo biramo. Çike seba tîyatroviraştiş bi zon (ziwano) ke beno vîndî, îdealîzm lazim o. (…) Eke şarê ma her çî ra raver zonê (ziwanê) xo heyato rojane de qisey keno û xo vîr ra nêkeno, zonê (ziwanê) ma vîndîbîyayîş ra xelisîno ra.”

Seba ke Tekîn Agacik par kot hepisxane, karê xo lete de mendîbî. Nika Agacikî ancîya (onca) dest bi stand-upê kirmanckî kerdo û kaybazanê neweyan kî perwerde keno. Projeyê eyo bînî kî antişê (ontişê) fîlmêde kirmanckî yo. Aye ra kî dot Tekîn Agacik wazeno ke şovê xo her ca de ke tede kirmancî ciwîyênê, uca bimusno.