Na derbe derbêda xedare û derbêda girane bîye. Na derbe derba dişmenê bêbextî bîye. Birîna na derbe jan dana û hem kî zaf xedar jan dana. Heya, tam hirîs û ponc însanê bêsuc û bêguneyî, hirîs û ponc însanê mehsûm û pakî, hirîs û ponc însanê feqîr û jarî, hirîs û ponc însanê sîvîlî, hirîs û ponc însanê dewîjî, hirîs û ponc kurdî, yanî hirîs û ponc canî hem verê çimanê dînya de hem kî verê çimanê ma pêrune de dewleta faşîste bi top û tifenganê xo day kiştene.

Gelo guna nê hirîs û ponc însanan çike bîye?

Gelo guna xo ju bîdon mazot ardene bîye, gelo guna xo ju pakete çay ardene bîye, gelo guna xo ju pakete cixara ardene bîye, ya kî guna xo letikê non zav û zêçê xo rê, may û pîyê xo rê, way û birayê xo rê, nêweş û seqetê xo rê ardene bîye?

Qet bêguman ê bêsuc û bêgune, mehsûm û pak, feqîr û jarî bîy. Ê hayrê verê dek û dolabanê Erdoganê gonîwerî û Fetullahê şimirî nêbîy. Ê derdê feqîrîya xo de û derdê letikê nona xo de bîy.

Çi heyf ke ma nê qetlîamê Roboskî rê zaf bêveng mendîme. Gere qirayîşê vengê ma ra hard û asmên bizingayênê. La caverdîme zingayena hard û asmênî, fekê ma ra ju cekuye nêvecîye. Gere ma verba zulmkaran de, verba bêbextan û xayînan de vengê xo, qewetê xo, hêzê xo bikerîme ju. La çi heyf ke ma verba zulmkaran de, verba bêbextan û xayînan de ne vengê xo ne qeweta xo ne kî hêzê xo ju kenîme û zaf bêveng manenîme. Coka ewro vampîrê gonîwerî bi gonîya feqîr û fûqarî mird nêbenê. Coka ewro destê vampîran yaxe û pîsîrê ma der o.

Hetanî ke ma nîya bêveng mendîme, nê gonîwerî kî bi destanê xuyê gonin û qilêrinan, bi destanê xuyê pilarin û mirdaran pîsîrê ma ranêverdanê.

Qatîyê ci bê, roj-mirojî însanî yenê kiştene, roj-mirojî însanî yenê guretene, hepisxaneyî bi însananê bêsuc û bêguneyan bîye pir û êndî hepisxaneyan de ca û teber ra kî însanî nêmendê.

Bêrêne ma dest û payanê nê gonîwer û qilêrinan bişiknîme û pîsîrê xo ra êndî warrodîme. Bêrêne ma vengê xo, qewetê xo, hêzê xo ju kerîme û lapaçêda rinde werteyê  çimanê  Erdoganî de piro dîme û lapaçêda rinde kî bierzîme ra binê goşanê Fettulah Gulen û Kîmyasal Necdeyî ra. Nîya bone ke wa belkî bêbext û xayînî reyna rixêda nîyanêne nêwerênê.

Qatî, gonîya mi de Selahattîn Demîrtaş ra bo. Mordemek teyna ke bi qeseykerdena xo verê fekê Erdoganî de dano piro, kul û birînê ma yê  ke jan danê, ti vanî belkî melem keno pira.

Hukmatê AKPa faşîste ra gere hesabê qetlîamê Roboskî bêrone pers kerdene. Qatîyê ci benê, serê nê qetlîamî reyna nîya bi ozur û mozuran, nîya bi zur û muranê Erdoganî yeno peymitene. Gere nê zulmkarî, nê bêbextî, nê xayînî, nê faşîstî… hesabê qetlîamê Roboskî biderê.

1 ŞÎROVE

  1. EZ BESENIKEN FAM BIKERINE KE CAYE SIYASETKARE U NUSTOXI KURDI, DEWLETA TIRKI KENE XO VIRRA U TENA GULEN U AKP REXNE KENE. ENDI KURDISTAN DE DOMENI SLOGAN ERZENE VANE BIMRO ERDOGAN. MESELA ERDOGAN YAKI AKP NIYA. MESELA DEVLETA TIRKA. 30 SERR RAVE DE CENCE MA VERBA FASISTU DA PIRO NIKAK JÜ DESTE SIYAY VAZENOKE MA DEVLETA TIRKI XO VIRRA KERIME U TENA VERBA AKP SIYASET BIKERIME. SIYASETA KURDI QEDIM QEDIM YENO ZEREYE SISTEM BERDENE. HER KES BIZONO KE ERDOGAN KE YAKI AKP KE SI HAZAR ERDOGAN YAKI AKP XAZIR O.

    SIYASETA BE PRENSIP U POPULISTE BDP ZERARE GIRS DANO. MISAL DEMISTAS BIRRA SERRE ERDOGAN, LABELE NO MUHIM NIYO. MESELA BIRAYIS NIYO. BDP JE TERRE JÜ PARTIYA TIRKI SIYASET VIRAZENA. BIRRENE, HEREDINE, MECLISTE SEWE DANE. NUK MUHIM NIYO. MUHIM QISEYE DEMIRTAS O: WAXTE DEWLETE QEDIYO, NO SEBA KURDIK NIYARO. ENDI DEMIRTAS SEKENO BIKERO, DEWLETE VENGE XO NIVEZENA. CIKE MAK ZONE MEKE TIRKIYA DE SIMA HEQA SARE KURDI NESEWEK NA, HEQA DEWLETE KURDI QISEY NIKERD, SEKENE BIKERE, DEWLETA TIRKI NIQARINA… TENA SEBA BEPRENSIBIYE REXISTINE KURDI HONA ROZE TENENA TARIY MA VER VINDENE….

Comments are closed.