Serrgêra Kiştişê Alîşêr û Zarîfe

Ewro serrgêra 74. ya kiştişê Alîşêr Efendî û Zarîfe Xanim a. Naye ra 74 serrî raver, yanî 9. temmuze 1937 de welatperwerê kurdî Alîşêr û cinîya ey Zarîfe hetê Rayberê Qopî û Zeynel Topî yê xayînî ra amey kiştene.

Alîşêr Efendî dewa Azgêrî ya Qoçgîrî de ame dinya, serra mayaxorabîyayîşî ya Alîşêrî tam bellî nîyo, texmîn beno ke roja kiştişê xo de 65 serre de bîyo. Alîşêrî ke Sêwas de perwerdeyê xo dîyo, dima jê (sey) katibê Mustafa Begî gureya. Yeno vatene ke ey kî duştê urisan de vejîyayo ceng û rind uriskî zanayêne. Serranê 1920an de Alîşêrî kî duştê sîyasetê tirkan de propaganda kerdîbî, hetta serewedaritişê Qoçgîrî de rolêde muhîm kay kerd. Serewedaritişê Dêrsimî de kî ey leyê Seyîd Rizayî de eskeranê tirkan de da pêro. Alîşêr hem esker hem kî şaîr bî, çi heyf o ke xeylê şîîrê ey heta nika nêamey dîyene.

Zarîfe Xanime kî Qoçgîrî ra ya. Zarîfe kî hertim leweyê Alîşêrî de da pêro, vatenan ra gore cinîkêda xirte bîye. Aye hem polîtîkaya dêrsimijan de aktîf eleqedar bîye hem kî komelî de rolêde muhîm girewt.

Serra 1937 de Alîşêr û Zarîfe bi Seyîd Rizayî ra amey têlewe, înan waşt ke şêrê bi Yewîya Sovyetan. Seba hazirîye ê roja bîne eşkefta (esketê) Palaxine de mendîbî. Birazayê Seyîd Rizayî Rayberê Qopî û kerwayê Alîşêrî Zeynelê Topî ke hetê dewlete kerdêne, amey eşkefte ke Alîşêr zîyaret bikerê. Uca înan Alîşêr Efendî û Zarîfe Xanime kiştî, sereyê înan birnay û ard bi eskerîya tirkan. Uca Rayber Qopî xelata kiştişê Alîşêrî girewte. O kî demê ra dime hetê qumandanê tirkan Alpdoganî ra ame kiştene.

Ewro Alîşer Efendî û Zarîfe Xanime Seyîd Rizayî ra tepîya jê (sey) kesê en muhîmî yê serewedaritişê Dêrsimî yenê hesibnayene.