Xeylê reyî vurnayîşê qerarê xo ra tepîya, sîyasetkaro dêrsimij Kemal Burkay bîletê xo herîna û 30. temmuze de cêreno ra bi Tirkîya.

Kemal Burkay 31 serran ra tepîya heyatê xo yê Swêdî caverdano û 30. temmuze 2011 de şono Îstanbul. Goreyê xebera ajansê Cîhanî ra Burkay naye ser o nîya vato: “Mi bîletê xo girewt. 30. temmuze de saeta 17 de ez Îstanbul der a. Kesî ra heredan nîya ez, seba aştî û demokrasî yena. Welatê ma xeylê wext kerd vîndî.”

Kemal Burkay serra 1937 de Dêrsim de qazaya Mazgêrdî de ame dinya. Anqara de fakulteyê huqûqî qedêna û serra 1965 de kot Partîya Karkeran a Tirkîya. Zemanê xo de, ey şaristanan jê (sey) Dêrsim, Xarpêt, Çewlîg û Erzîngan de sîyaset kerdîbî. 1966 de sebebê nuşteyêde xo kot hepis. Serra 1975 de ey Partîya Sosyalîstan a Kurdîstanî naye ro û 1980 de Tirkîya terk kerd. Serra 2003 de bi qerarê xo partîye ra vejîya. Eleqedarîya sîyasetî ra qederî Burkay kî xeylê meqale, kitab û şîîrî nuştî.