Xebera ANF û Rûdawî ra gore, kantonê Cizîre yê Kurdîstanê Rojawanî de destûrê weşanî yê kanalanê Rûdaw û Orîent TV ameyî betal kerdene.

Sermîyanîya çapemenî ya kantonê Cizîrê destûrê karê kanalanê Rûdaw û Orîent TV bi sebebê ke “propagandaya dişmenîya şarê kurdî, sazgeh û şehîdanê ci kenê” betal kerd. Vilaweke de yeno vatene ke “Di serran ra zêde r’ o ke seba atmosferêde destdayî karanê çapemenîye rê raye peyda bena, sazgeh û dezgehê çapemenîye semedê kar û xebatanê xo Kantonê Cizîre de rêxistin benê, îmkananê xo pêşnîyaz kenê. Coka bi desan kanalanê televzîyonî yê hêremî û mîyanneteweyî ci ra fayde dî.”

Kantonê Cizîre: Rûdaw û Orîent TV propaganda kenê

Sermîyanîya Çapemenî yê Kantonê Cizîre ya ke bi qerarêde resmî hetê serekîya Meclîsê Sermîyanî yê Kantonî awan bîbîye, aye ra gore rojnamegerê ke azadîya çapemenîye seba faydeyê xo xebitnenê û propagandaya dişmenîye kenê û xeberanê zuran kenê vila, ê teberê karê rojnamegerîye de gureyenê. Qerarê sermîyanîye ra gore kanalê Rûdawî ke merkezê xo Hewlêr der o û kanalê Orîentî ke merkezê xo Dubaî der o, êdî destûrê înan ê karî yeno betal kerdene. Îzahat de yeno vatene ke nê her di kanalî xeberê ke rastîye ra dûrî yê, înan kenê vila. Kantonê Cizîre ra gore nê kanalî bi tewirêde sîstematîk hêrişê sîyasî yê “şoreşê şarê kurdî” kenê, wayîrê fikranê şovenîst û nîjadperestan ê.

Çi esto ke îzahatê ke Rûdaw ser o weşanîya, tey qedexe şermezar beno. Torra Medya ya Rûdawî vana ke no qerar qerarêde çewt û xelet bî. Rûdawî ra gore tîmanê înan ê rojnamegeran hertim karê xo de rîayetê qanûnanê kantonan kerd. “Rojnamegeranê Rûdawî qet wezîfeya xo ya meslekî ra nêvejîyaya û medyaya PYD û PKK ra hîna profesyonel weşanê serebûtanê Kurdîstanê Rojawanî kerd. Coka kî Rûdaw şarî mîyanî de bîyo dezgehê medya yo tewr hêzdar. Herçiqas ke Rûdawî kêmasîyê ke kantonan de estê, ê musnayî, hertim muhîmîye da ci ke Kurdîstanê Rojawanî raver şêro û xurt bo.”

Rûdaw: Wa Rojawan nêbo sey Koreya Vakurî

Îzahatê xo de Rûdaw vano ke çend rojnamegerê xo hetê selahîyetdaranê Rojawanî ra keyeyanê xo ra ameyî teber kerdene. Kantonan de seba rojnamegeranê Rûdawî xeylê astengî estê. Boyna, kanal giranî dano ser ke bê karê weşanî yê Rûdawî, vengê Kobanê caran nêreştêne çapemenîya dinya. Bi cadayîşê na pencere, kanton û PYD îmkanê weşanê mîyanneteweyî betal kenê.

Peynîye de Rûdawî pêşnîyaz keno ke Sermîyanîya Çapemenîye reyna qerarê xo ser o bifikirîyo û azadîya çapemenîye mebirno. Nêke rêxistinê mîyanneteweyî qayîtê rewşa Kurdîstanê Rojawanî kenê û wa mevaje ke şarê ucayî sey Koreya Vakurî de ciwîyeno.