Xebera Rûdawî ra gore, yew endamê sermîyanîya Partîya “Yekgirtûya Îslamî ya Kurdistanê” (Yekgirtû) va ke her çar partîyanê Kurdîstanê Başûrî, yanî YNK, Gorran, Komelê Îslamî û Yekgirtû qerar da ke Mesûd Barzanî dina serrî sey serekê Herêma Federal a Kurdîstanî bimano.

A xebere ra gore o endamê Yekgirtû Ebûbekir Elî yo ke hesabê xo yê Facebookî ser o melumat da. Elî ra gore yew şertê dergkerdişê serekîya Barzanî o bî ke Herême de sîstemo parlamenter awan beno. Çi esto ke hîna hetê parlamentoyê Kurdîstanî ra vilaweka resmîye nêameye dayene. Hesabê Twîtterî yê Gorranî de kî ame nuştene ke hîna qeraro qetî çin o û babete parlamento de munaqeşe bena.

Demê serekîya Barzanî di serran ra ver reştbî peynîye. Parlamentoyê Kurdîstanî îstînayî demê ey seba dina serran kerd derg. Nika PDK wazeno ke dina serrî derg bibo. YNK, Gorran, Komelê Îslamî û Yekgirtû pêşnîyazê qanûnî kerdbî ke Herêma Kurdîstanî de sîstem bêro vurnayene beno sîstemêde parlamenterî. Nîya parlamento serekanê ameyoxan çîneno we, şar ney. PDK duştê na pêşnîyaze der a.