Her sere, roja 8 ê adare, ‘heqê cêniyan’ yênê vira ma, a roje, ma qalê  heqê çêniyan kenime.

8 ê adare ke derbaz bi, hata serêna, hata reyna 8 ê adare, ‘cêniyi sax, ma sılamet’.

Klara Zetkin, Rosa Luxenburg, u ê cêniyê ke dınya a roje de, seba ke heqê cêniyan bıkerê sembol, saya inan de 8 ê adare, ame qebul kerdene. Hama no, seba dınya ewroyi bes niyo.

Şıma ke nê adeti, tenya seba a roje, ‘heqê cêniyan’ biyarê xo vire, no adet beno tomet.

Heqê cêniyan wastene, gırêdayê mantıq u fıkriyo.

Mordem ke, heqê cêniyan, zê heqê mordem u mordemiye mezano, heni mevêno, çıqas hêyştê adare de qalê heq u huquqi bıkero, no mordem, kemiyo.

Dı mordemtiye çin a, dı heq, dı huquq, dı serbestiye çin ê.

Mordemtiye juyo, heqê mordemiye ki juyo.

Şıma ke tenya her sere, roja hêyştê adare qalê heqê cêniyan bıkerê, zaf xêr şıma de çin o, ez şıma ra vaci.

Gorê mı, hata ke mordemtiye na dınya da bı bo, zerê heqê mordemtiye de, heqê  cêniyan ki est ê.

Naye qebul kerdene muhım a.

Tı, seba xo çı heq u huquq wazena, gereke seba her kesi bıwazê ke ez bızani tı durust a.

Qa ‘zerê her kesi’  de ceniyi ki est ê.

Lam u cımê naye çin o.

Seba xo çı wazena, gereke seba cêniyan ki aye bıwazê.

Mordemo bê qusur çin o.

Hama mordemtiye, ‘qusur’  qebul nêkeno.

Şeş goşe kesi çino, new destê kesi çinê.

Ne camêrd seba ke camêrd o, berz o, ne cêniye seba ke cêniya ‘cêr’ de niya.

Felsefê moedemiye, naye qebul nêkeno.

Xo ra Klara Zetkin, Rosa Lumxemburg u ê cêniyê zanaye u emekdari ki na rastiye her tım ardi bi zon.

Hama maya mına rebene ke vatê  ninan nêzanıte biye, ‘gunekare’! niya ke.!

É mayê ma ke, porê xo seba ma kerdi sıpê.

É wayê ma ke, ‘nêwerdi, nêşımıti, dayi ma’.

É cêniyê ke, ebe ma, kewti rayan, veciyayi koyan, zılım diyê.

Qehremaniya inan, zaf camêrdan, tewrê xo de vetêne.

Edebiyat de ê est ê, kılaman de ê est ê en zaf.

Domanan ê vırastê, qar u qotıkê inan ê antê.

Mayê ma ke çinibiyêne, ma ki nêbiyêne.

Pêydakerdox ê, emekdar ê  cêniyi.

Raya hepısan de, porê  xo sıpê kerdê. Çımê inan, hesreta ma de rayan de mendê.

Ma ra berbê, ma ra fıkıriyê. Hewnê xo de, ma diyê. Fistanê xo, seba ma, vayan ra fistê  ra. Adıran derbaz biyê seba ma.

Seba ma camêrdan..

É ke çini biyêne, ne heskerdene, ne eşq çinibiyêne.

Bê inan, ne dınya bena şên, ne zerê ma.

Şênatiya na dınya, gorê mı verdê cêniyê.

Coka ke seba inan, hêyştê  adare bes niyo.

365 roji,  seba inan bo.

Ciwinayene, heq u huquq çıqas ke ma camêrdan ra lazım o, handayê ki inan ra lazımê.

Beno ke ma camêrdan ra zêde, heq u huquq ra ê layiq ê.

Bandoriya camêrdiye, na dınya kerda qılêr.

Nıka ma, seba mordemiye, verde verba qılêriya bandorê camêrdiye gereke vındıme.

Eger ke ma mordemtiye wazenime u şeveknenime..

Ez ebe nê fıkrê  xo, wazena 365 roje, bıbo hêyştê adare.

Çı ke, kulturê bandoriya camêrdiye, sebebê xırabiye wo.

Sebebê herbi, sebebê, zılım u weraniyo.

Welatê ma, ebe na bandoriye kewto bınê desti.

Cêniyi sembolê nermiyeyê, bandorê camêrdiye sembolê hışkiye u xederiye wo.

İlhami Sertkaya

8-3-2010

Nuşteyo peyên‘NİRVANA’! ERÉ EZ TO RA VANA!
Nuşteyo verênRINDİYE U RINDEKİYE
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.