Namê xo, verde Nirvana nêbiye. Kuçanê metropoli de, ‘enternasyonalizmi’! aye vurna, aye werde. Rastiya xo ra vısiya, kamiya xo ra rışiya. Namê  zaf çiyan nıka zanena, hama namê  dewan u şukanê xo nêzanena.

A, ‘Enternasyonalist a’!!

Zalım u zulımiya diktatoran u dewletanê duri zanena, domanê Filistini fam kena, zalımiya ke serê şarê xo de ra, nêzanena. Hina ke namê xo seba eşqê ‘enternasyonalizmi’! nêvurna biye, porê xo verba tije şane kerdêne, çım u buriyê xo, usar bi tı vana. Zonê xo mirazê kılaman, vengê xo, tanya adırê eşqan biye. Ebe na rındekiye, şênatiya zerê mı neqişnêne, zelaliya aye, zerê mı helênêne.

Heni biye bıra.

Hama nıka heni niya.

Roji, aşmi, seri derbaz biyi, sıpitiye, perda xo serê porê aye de, xeribiya siyaye zerê mı de, xo fiste ra.

Eşqê ma, zonê  xo vindi ra kerd.

Asimilasyon u inkari, ma helesna ro.

Heskerdene, bi ser u bın.

Edebiyatê şari de gêrena, kıtabi zonanê binan de wanena ez, aye nêvênena.

A, ne Elsa fransayiya, ne Juliyeta Ewrupayi niya.

A, rındeka ma biye

Nıka vindi biya.

Edebiyatê ma, kıtab u zonê ma, ebe nê rindekan xemıliyêne. İnkar kewt mabênê ma, iqrar rışiya, rastiya kamiya ma, vısiya. Seran ra tepya, a nıka metropolê Tırkan de, biya ju ‘Tırkıje’.

Zerê aye de ne rındekiye mende, ne rastiye.

A, nıka ‘enternasyonalista’!

Kardiya inkari, xori kewta eşqê ma, bıra bıra!

A nıka; Porê xo verba aynê zurekeri şane kena, çım u buriyê qeytani, qılêriya Brezilya’yiya tı vana. Gege namê xo kena ‘Anna’, gege ‘Nirvana!

Nirvana, Nirvana!

Erê ez to ra vana.

Ebê nê enternasyonalizmê  inkari, rast ke, tı nıka zerê mı xırab, helênena. Mı berbayena xo kerde lete, To ebe asimilasyoni aqılê xo kerdo nono pede.

Tayê to ra, tayê  xo ra berbena.

Nirvana!

Erê eşq zerê ma de veciya, hêrs bi, herediya, şi gılê koyanê duri erê!

Namê xo bıge bê. Ebe rastiya xo, ebe zonê xo, ebe kamiya xo bê.

Bê, newe ra tı bı be rındeka dewe, ez xo ra budelayê heqiya.

Tı zanena ke ez ‘dızdê  eşq u adıriya’.

To de adır tırena, eşq tırena bê.

Nirvana!

Erê ez to ra vana

Çênê tı Xızıri, tı heqi şinena

Me be kaykerdoxe ‘enternasyonalizmi’, verde bı be rındeka Welatí.

Serê rastiya xo de qal bıke vace ‘heqê cêniyan’, me be ‘kadın haklari’!

Zur o Nirvana!

To, rastiya xo ra vısnenê  çênê!

Guna cêniyê ke verba inkari, porê xo kerdê gezık, vılê şıma de rê erê!

Erê resmê inan seba hobiyanê şari, bı namê ‘dewrimcitiye’! meke qedayê inkari.

Resmê inan darde kenê, vanê ke ‘’doğuda kadınlar’!

Dıkê ‘doğu, batı, kuzey’ çık o?

‘’Güney-doğu, kuzey-batı’ çık o dıkê?

Cigera mı; Nê xelekê zincirê inkariyê erê!

Her ju xeleke ra aqlê  ma wazenê girê bıdê. Hata ke tı bıbê ‘’Nirvana’’, ez namê toyê rasti nêvana.

Nirvana!

Erê ez to ra vana!

Tı ke sosyete wa, bı  be sosyetê xo. Tı ke ‘liberal a’, bı be liberalê xo. Tı ke ‘zaneya’,wa, bı be zaneyê xo. Tı ke ‘sosyalist u demoqrat a’ bı be ê xo.

Erê xo inkar meke dıkê?  Waxto ke ‘lazım bi’! mevace ‘ez kurd a zaza wa’. Endi naye, gege memurê dewletê inkari ki vanê. Tı ke ‘kurd a, Kırmanc a, zaza wa’, ma kotiyo kamiya to, zonê to, tarıqa to, rastiya to, heqa, to, Nirvana?

Mexapiye, ma mexapne Nirvana!

Nirvana!

Erê ez to ra vana!

İlhami Sertkaya

6-3-2010

Nuşteyo peyênSuredar vejîya!
Nuşteyo verênQEY TENYA 8 É ADARE?
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.