Serrgêra 27. ya qirkerdişê Helebce de, mexdurî ewro Kurdîstan de yad bîyî. Bi hezaran helebceyijî beşdarê merasîmê yadkerdişî bîyî. Dîktatorê kanî yê Îraqî Sedam Huseyînî roja 16. adare 1988 de 5 hezarî kurdî bi çekanê kîmyewîyan kiştbîyî.

“qetlkerdox û dîktatorî nêmendî, labelê Helebce lingan ser o mende”

Merasîm meydanê Heykelê Helebce de ame viraştene. Mintiqayanê bînan ê Kurdîstanê Başûrî ra kî beşdarî ameyî. Yew beşdare cinîya serekê YNK Celal Talabanî Hero Îbrahêm Ahmed bîye. Aye ra teber Hetkarê Serewezîrê Herêma Federal a Kurdîstanî Qubad Talabanî, selahîyetdarê KCK Ferhan Amara û xeylê temsîlkarê bînî yê partî û rêxistinanê kurdan beşdarê merasîmî bîyî. Badê ke beşdaran goristanê qirkerdişî zîyaret kerd, yadkerdişî dest pêkerd. Yadkerdiş de konsolosîya Almanya û Hollanda ra kî temsîlkarî estbîyî.

Meydanê Yadkerdişî de temsîlkarê partî û dezgehanê kurdan ameyî têlewe (Resim: ANF)

Hetê hukmatê Herêma Kurdîstanî ra kî mesaj ame dayene. Vilaweka resmîye de qirkerdiş şermezar bî. “Ewro ma bi îftîxar ney vanîme: qetlkerdox û dîktatorî nêmendî, labelê Helebce lingan ser o xirt û xosere mende. (…) Naye ra kî dot, Helebce ewro seba şarê kurdî manaya cîya ya sîyasî, kulturî û tarîxî dana. Helebce duştê qetlîamê şarê kurdî de sembolo girs ê şeref û onurê cuya newî yo.”

Dêrsimijan qirkerdiş şermezar kerd

Beledîyaya Dêrsimî kî qetlîamê Helebce şermezar û yad kerd. Meclîsê Şarê Dêrsimî, tede hemserekê şaredarî Mehmet Alî Bul û hetkarê hemserekîye Îbrahîm Kasun û Huseyîn Tunç, Kuçeya Hunerî ya Mamekîye de ameyî pêser ke qirkerdişî protesto bikerê.

Meclîsê Şarê Dêrsimî vilaweka xo de kî qirkerdişê Helebce şermezar kerd (Resim: Şaredarîya Dêrsimî)
Meclîsê Şarê Dêrsimî vilaweka xo de kî qirkerdişê Helebce şermezar kerd

1 ŞÎROVE

  1. bira, bê ez to rê yew meselaya dergi vaco
    meselayêk ke koy pey helîyay
    dar û birr pey bermay
    roc pey şermaya
    ///
    jehr asmên ra vara
    qefelna asmênî maran û dimaşkilan
    ///
    bira, bê ez to rê yew meselaya dergi vaco
    gedan xu rê kaykerdîni awi di
    gedey ki paşta marda xo ra beste bî
    gedey ki destê pêrdê xo girewtbî
    cinîyan rişta rîştê
    ///
    cinîyan nan tenuri ra daynê
    ê zî sey min û to bî
    huyaynê
    bermaynê
    peşmenîyaynê
    yarî kerdinê
    ///
    jehr vara asmênan ra
    verî kezeba înan veşay
    badî qelebîyay cadê xo di
    gedeyê gengulay hewn di mendî
    heton-heton
    leşay merdiman veşay sey kila adirî
    gedey fekakerde mendî
    desmali destê veyvekon di mendi
    huyî zeredê ciwûnikon di mend
    erd û asmên bermay
    ///
    jehr asmên ra vara
    keyeyî mendî bêwayîr, bêsermîyon
    cenî û cormêrdî pêro pêser ra ginay
    ne nalayîşêk ne vengêk
    cadê xo di mendî bêziwan
    ///
    bira, bigoştari mi ra
    jehr varaynê asmên ra
    maran û dimaşkilan asmên qefelnabi bira
    ***
    Ezîz DERDAN

Comments are closed.