Qetlîamê Helebce yad bî

Serrgêra 27. ya qirkerdişê Helebce de, mexdurî ewro Kurdîstan de yad bîyî. Bi hezaran helebceyijî beşdarê merasîmê yadkerdişî bîyî. Dîktatorê kanî yê Îraqî Sedam Huseyînî roja 16. adare 1988 de 5 hezarî kurdî bi çekanê kîmyewîyan kiştbîyî.

“qetlkerdox û dîktatorî nêmendî, labelê Helebce lingan ser o mende”

Merasîm meydanê Heykelê Helebce de ame viraştene. Mintiqayanê bînan ê Kurdîstanê Başûrî ra kî beşdarî ameyî. Yew beşdare cinîya serekê YNK Celal Talabanî Hero Îbrahêm Ahmed bîye. Aye ra teber Hetkarê Serewezîrê Herêma Federal a Kurdîstanî Qubad Talabanî, selahîyetdarê KCK Ferhan Amara û xeylê temsîlkarê bînî yê partî û rêxistinanê kurdan beşdarê merasîmî bîyî. Badê ke beşdaran goristanê qirkerdişî zîyaret kerd, yadkerdişî dest pêkerd. Yadkerdiş de konsolosîya Almanya û Hollanda ra kî temsîlkarî estbîyî.

Hetê hukmatê Herêma Kurdîstanî ra kî mesaj ame dayene. Vilaweka resmîye de qirkerdiş şermezar bî. “Ewro ma bi îftîxar ney vanîme: qetlkerdox û dîktatorî nêmendî, labelê Helebce lingan ser o xirt û xosere mende. (…) Naye ra kî dot, Helebce ewro seba şarê kurdî manaya cîya ya sîyasî, kulturî û tarîxî dana. Helebce duştê qetlîamê şarê kurdî de sembolo girs ê şeref û onurê cuya newî yo.”

Dêrsimijan qirkerdiş şermezar kerd

Beledîyaya Dêrsimî kî qetlîamê Helebce şermezar û yad kerd. Meclîsê Şarê Dêrsimî, tede hemserekê şaredarî Mehmet Alî Bul û hetkarê hemserekîye Îbrahîm Kasun û Huseyîn Tunç, Kuçeya Hunerî ya Mamekîye de ameyî pêser ke qirkerdişî protesto bikerê.