Projeyê DTK ke ju (yew) hewte ra ver Tirkîya de binê nameyê “Otonomîya Demokratîke” de ame beyan kerdene, no taw fekê her kesî der o. Na pêşnîyaza roşnvîran ra gore gerek ke seba çareserkerdişê meseleya kurdan, kurdî bi xo ala, îdare, asayîş û ekonomîya xo îdare bikerê.

Teferuatanê projeyî de nê pêşnîyazî yenê vatene:

  • Mintiqaya otonomî Kurdîstan de leweyê tirkî de kî kurdkî zonêde (ziwanêde) resmî yo. Nê di zonî (ziwanî) jê (sey) aşurkî, suryankî, erebkî û armenîkî qisey benê, yenê perwerde kerdene û naye kî qanûno bingeyên de yeno garantî kerdene.
  • Kurdkî her ca de yeno xebitnayene. Kreş ra heta unîversîte de gerek ke kurdkî kî bibo zonê (ziwanê) perwerdeyî.
  • Nameyê kurdkî yê cayan yenê vurnayene û nameyê xoyê orîjînalî cênê.
  • Mintiqa otonomî de ekonomî kî xoser a.
  • Tebîat de heqê xopawitişî sirf seba eskeran ney, wa seba seveknayîşê nasname û komelî kî garantî beno.
  • Welato muşterek Tirkîya û Kurdîstan o. Zereyê sînoranê Tirkîya de şarê kurdan heqê xo bi ju (yew) statu garantî keno.
  • Kongre ya Kurdîstanê otonomî temsîlkaranê xo rusneno parlamentoyê Tirkîya. No parlamento de sîyaset seba welatêde muşterek yeno kerdene.
  • Mintiqa otonomî ala û sembolê xo xebitnena.

Nê rojan çapemenî û sîyaset de şîrove û fikrê cîya-cîyayî otonomîya demokratîke ser o amey vatene. Nînan ra tayê nimûneyî:

  • Devlet Bahçelî (serekê MHP): Bi no proje welatê ma giran-giran yeno parçe kerdene, êndî her kes gama xo rast bierzo.
  • Selahattîn Demîrtaş (Sereko têduşt ê BDP): Bi no model ra şarê kurdan hardê (erdê) xo de qederê xo bi xo tayîn keno û xo bi xo îdare keno. No model ra ma parçebîyayîşê Tirkîya nêverdanîme.
  • Mehmet Alî Şahîn (Parlamenter): Înan (BDPijan) mi ra vat ke tirkî ra teber juna (yewna) zono (ziwano) resmî nêwazenê. Naye ra teber mi ra vat ke zereyê parlamentoyê Tirkîya de tirkî ra qederî juna (yewna) zon (ziwan) nêwazenê û naye ser o hevalê xo kî îqaz kerd. Ez nê vateyî zaf muhîm vînena û fikrê ma naye de ju (yew) yo.
  • Altan Tan (Rojnamenus): Heqê perwerdeyê bi zonê (ziwanê) kurdkî û peyserdayîşê nameyanê dewan ûsn. qanûno bingeyî yê 1921 de xora estê. Gereke merdim (mordem) nika ju (yew) game raver şêro û ser o bifikirîyo ke nê çîyan pratîk de senî yenê viraştene. Tena qiseykerdene bes nîya.
  • Oral Çalişlar (Rojnemenus): Êndî kes besenêkeno ke waştişê nasnameyê kurdî înkar bikero. Kurdî meseleya zonê (ziwanê) xo ser gamê peyser nêerzenê.
  • Nuray Mert (Rojnamenuse) Ma ke eşkerakerdiş DTP rind biwanîme, fehm kenîme ke kurdî êndî wazenê ke xo bi xo îdare bikerê. Seba naye kî ju (yew) dewlete ya kî xoserîye rê ney, forumê otonomî ser o gureyenê.
  • Alî Bayramoglu (Rojnemenus): Bi no proje kurdî êndî (êdî) nêwazenê ke ju (yew) dewleta cîyaye ronê. Bi sînoran problemê xo çin ê. Labelê bellî nîyo ke kurdî sîstemêde girêdayeyê Tirkîya ya kî xoser wazenê.
  • Mehmet Altan (Rojnamenus): Ju (yew) cigêrayîş esto, binê nê cigêrayîşî de çi esto, qet net nîyo.

CEWAB BIDE

Keremê xo ra şîroveyê xo binuse
Keremê xo ra nameyê xo binuse