Ewro newroza bimbarek a. Ez newroza şima zerrîya xoya pake ra pîroz kena. Şima zaf newrozan bivînê.

Ewro newroza bimbarek a. Na newroza emserêne mucadelêyê şarê kurdî rê bimbarek bo. Rayîrê azadîya kurdan akerde bo û bêtifaq û bêqeza bo.

Ewro newroza bimbarek a. Nîşana azadî ya, nîşana xoserî ya û nîşana binê zor û zulman ra xelasî ya. Ewro roja serkewtişê Kawayîyê qehremanî ya, îşaretê roja qelibîyayîşê Dehaq û Dehaqan a. Heme şaranê bindestan rê pîroz û bimbarek bo.

Ewro newroza bimbarek a. Roja heqî ya, roja heqgirewtîşî ya. Îşaretê xoverdayîşî ya. Ked û emegê kedkaran rê pîroz bo.

Şaro kurd her serre newroza xoya bimbareke bi hêvîyêke pîroz keno. Bi mîlyonan herekîyêno ro meydanan û rik û înadê xo yê azadîwaştişî mojneno. Bi kinc û bergê xoyê renginan newroza xo bereqneno. Bi coş û reqsê xo hêvîyanê xo weye keno. Bi destmala kesk û sûr û zerde ereqa xo ya sey varanê wisarî ziwa keno. Vera deyîranê keçkanî û yê eşîran de wehcê xo yê azadî şikneno. Vera def û zirnayan de govende keno û çokan şikneno û kiftan lerzneno. Bi ziwanê xo yê hezar serran waştişê azadîya xo rê qîreno. Beno yew gizgarikê (çîkê) adirê newroze û bîbikanê Dehaqan teqneno.

Newroze ters û xewfê serdestan a. Vera, heqwerd, çimsûr û zordestan yewek şoriş a.

Newroze şarê bindestî rê çilaya azadî ya. Newroze 21ê adara rengîn a. Newroze şewan tadaya kerda roj, tarîyan açarnaya kerda roşn.

Newroze tengîya xezebê zimistanan ra xelasnayîş a û sey pindê daran hêvî û omidan akena. Bext û qedera rojanê sîyayan û tengan ro sipîye açarnena.

Na newroza emserî ma rê hêvîyêka bîn a. Ya zî mi rê û şarê ma kirmancan rê seba ziwanê ma, seba kirmanckîya ma hêvîyêka newa ya. Dîyalekta ma kirmanckî (dimilkî/zazakî/kirdkî) rîyê serdest û çimsûran ra bi dek û dolaban û bi çuwayanê zorî tepay (pey ra) menda.

Ma na newroze bikî hêvîya eşqê ziwanê xo û ma kirmanckîya xo qet xo vîr ra nêkerê û ma bi na kirmanckîya xoya delale qalî bikerî, bi kirmanckîya xoya nazike biwanê û bi kirmanckîya xoya neqşîne binusê.

Ma na newroze xo rê bikî şorişê ziwanê xo. Ma nê ziwanê xo yê ke nika kewta binê dest û lingan, na rewşa xirabe ra bixelesnê.

UNESCO vato, kirmanckî ha ruhî ver, kirmanckî sekeratî ver de ya, ha bînê cila mergî de û mirena û na dinya ra bar kena şina. Ma nê vatişan şermezar bikî, ma ziwanê xo zergûn bikî.

Ma na newroze de bi ziwanê xo biqîrî û ma şarê xo rê û welatê xo rê û ziwanê xo rê xelasî biwazê.

Na newroze bi na hevîya newa û bi hêvîyêka girde şarê ma rê û ziwanê ma rê pîroz û bimbarek bo.

Mehmud Nêşite