Mîtîngê Aştîye de ke paxtextê Tirkîya Anqara de ame viraştene, uca ewro tewr tay di bombayî teqayî. Bi desan merdeyî estê.

Derheqê hûmara merdeyan de hîna melumato qetî çin o. Wezaretê karanê zereyî yê Tirkîya vilaweka resmîye de da zanayene ke 30 kesî merdê û 126 teneyî bîyê dirbetinî. Labelê goreyê serdozger Kodalakî ra hûmara merdeyan 47 a. Duştê ney de masaya krîzî ya HDP melumat da ke teqayîşî de 69 kesan canê xo dayê, 230 kesî kî bîyê dirbetinî. Nê reqemî hetê endamê merkezê krîzî yê HDP Sedat Yagciogluyî ra tedîq bîyî. Wezîrê weşîye Mehmed Muezzînoglu‬yî kî da zanayene ke 86 merdeyî û 186 dirbetinî estê. Çi esto ke hîna xeylê dirbetinî estê, coka beno ke hûmara merdeyan hîna bena berze.

anqara miting 1

Nûmayîşo ke hetê rêxistinanê KESK, DÎSK, TMMOB ûêb. ra organîze bîbî, saeta 09:30 de garê trenan ê Anqara de dest kerdbî ci. Xeylê kurdî kî beşdarê nê mîtîngî bîyî. Mîtîng ke şîyêne, dorê saeta 10:04 de tewr tay di bombayî teqayî. Sey netîce bi desan kesî heyatê xo dayî, bi seyan kî bîyî dirbetinî. Dirbetinî ameyî berdene nêweşxaneyan. Vîdeoyan de yeno dîyene ke polîsî mudaxeleyê ardimkerdoxan kerd ke waşt dirbetinan biberê nêweşxaneyan. Serebût ra dime yew qedexeyê weşanî yo resmî seba radyo û televîzyon ame ronayene.

Demîrtaş: Dewlete rêzeqetil a

Hemserekê partîya HDP Selahettîn Demîrtaşî derheqê serebûtan de qisey kerd va ke no hêriş îlanê KCK yê mutareqe ra dime qewimîyayo. Verê banê HDP ê Îstanbulî de Demîrtaşî qisey kerd va “Demo ke mutareqe yeno waştene, o dem Anqara de ver bi înanê ke aştîye wazenê, hêrişêde nîyanên ame kerdene. (…) Embazê ma ceribnenê ke meyîtan wedarê, dirbetinan biberê nêweşxaneyan. La şima vîdeoyan seyr bikerê, polîs gaz erzeno. Gaz erzîno werteyê meyîtan de, virênîye ro ambulansan cêno. Werteyê Anqara de qetlîam qewimîya, labelê ambulanse ney, hêzê polîsî yenê. Yeno waştene ke hûmara merdeyan hîna berz bo. Înan Dîyarbekir de kî nîya kerd, verê çimanê ma de gaz eşt dirbetinan ser. (…) Ma duştê dewletêda mafya, qetil, hetta rêzeqetile der îme.”

anqara miting demirtas
Hemserekê HDP Selahettîn Demîrtaş: “Werteyê Anqara de qetlîam qewimîya, labelê ambulanse ney, hêzê polîsî yenê.”

Mayê şeme yê ke her peyê hewteyî de yenê têlewe, na fay semedê qetlîamê Anqara ra fotografê merdimanê xo tey nêberdî. Mayanê şeme derheqê hêrişî de va ke: “Ma kerdoxê nê qetlîamî Dîyarbekir û Pirsûs ra nas kenîme.” Mayê şeme ewro reya 550. Îstanbul de ameyî têlewe.

CEWAB BIDE

Keremê xo ra şîroveyê xo binuse
Keremê xo ra nameyê xo binuse