Mi ra ke pers bikerdêne, tirê temsîlkarê muzîkê Kirmancîye yo tewr tesîrdar yê nê çaxî kam o, bêguman nameyê Mikaîl Aslanî na lîste mîyan de bibîyêne. Mi Mikaîl Aslan pê muzîkê xo sereyê serranê 2000an de nas kerd. O wext albumê xo Agêrayîş û dima kî Kilitê Koyû vejîyabîyî. Mi dî ke no mordem muzîkê ma yo tradîsyonel ard demo ewroyên û newe ra can da ci, tarz û tonê tezeyî şanitî pira. Tabî ewro Mikaîl hunermendanê kirmancanê tewr namdaran ra ju yo, tesîrê muzîkê ey reseno her parçeyê welatî.
Teyna muzîk û huner ney, la mordemê peyê eseran kî bala mi ontêne. Coka, wexto ke çend asman ra ver ma ameyîme têlewe ke tîkê mobet bikerîme, zaf keyfê mi pê ame. Sima yê bîvînê ke Mikaîl hem hunermendêde qedirgiran û zanayox hem kî mordemêde zerrîsenik û xêrcan o. Ma teyna albumê ey o newe ser o ney, la xeylê babetan ser o qesey kerd: muzîk, kultur û zonê ma. Şima ebe çimanê xo bivînê, qerar bidê tirê tarîfê mi raşt bîyo ya ney.
Jê hertim, bimanê weşîye de, rêça sar û zonê xo de bimanê.
