Şaşiya gırse, ‘bêkamiye’ wa.
Kamiye zon o.
Zonke me bo, kamiye nêbena.
Dewle Tırki ma de verde zon gıroto.
Wastena dewlete awa ke, ma, ‘bêkamiye’ bımanıme.
Coka ke verde erişê zonê ma kerdo.
Zon ke bıqediyo, ma qedinime
Xo mexapnıme.

Ebe zonê Tırki, kamiya ma, zonê ma nêbeno.Ebe zonê Tırki, her çi ke şi, ma kamiye u zonê xo ra duri manenime.Duri mendene, vindibiyene wa.
Ebe zonê Tırki vate u qesa şımayê ‘Dilimize sahip çıkalım” zur o.
Ebe zonê Tırki ‘kimliğimize sahip çıkalım’ zur o.
Na dınya de, şarêde zê ma, halêde zê ma çino.
Her kes xora pers bıkero ‘Qey ez zonê xo nêmısena’?
Şıma ke zonê xo nêmısenê, nêwazenê bımısê, inkarciyan ra lome mekerê.
Lomê şıma zur o.
Sebebo ke şıma xo u şarê xo xapnenê çık o?
Sebebo ke, şıma heskerdena zonê şıma de duri kerdo çık o?
O sebeb, kê ma , welatê ma vêşno, şıma naye zanenê.
Şıma ke zonê xo memısê, ‘dest bêçıkê şıma de dest huner’ bıveciyo ke mı ra, ma ra çı?
Şıma ke xızmeta kamiya xo mekerê, zaneyê şıma, hunerê şıma mı ra, ma ra çı?
Ma ke welatê xo de, sareberz, serbest mebıme,ebe zonê ma de mekteb çini bo, ebe zonê xo de perwerde mebıme, zonê bini mı ra çı?
Statuyê ma, huquqê ma, irade u idarê ma ke me bo,ma bı xo welatê xo de, xo idare mekıme, idarê gend u gewendê amir u memurê Tırkan mı ra, ma ra çı?
Ma ke qederê xo, bı xo tayin mekıme, qederê ma ke Tırk tayin keno, o qeder mı ra, ma ra çı?
Heq u huquqo ke dınya aleme ra lazım u mınasib o, ma ra ke mınasib mevênê, heq u huquqê dınya aleme mı ra, ma ra çı?
Na dınya de, her şar gorê xo serbest o,ma ke sebest nime, serbestiya dınya aleme ma ra çı?
Na dınya de 300 ra zêde dewleti est ê, dewleta ma ke çini bo, dewletê dınya aleme ma ra çı?
Heq u huquqo ke seba dınya aleme adet o, ma ra ke tomet bo, heq u huquqê dınya aleme ma ra çı?
Ma ke, bıqedime, biyena dınya aleme mı ra çı?
Vengê zonê ma ke çini bo, rengê kamiya ma ke bıqediyo, veng u rengê dınya aleme ma ra çı?
Wayêne, bırayêne!
Bêrê ma zonê xo raxelesnıme
Bêrê ma tarıqa xo rast bıkıme
Bêrê ma kamiya xo raxelesnıme
Bêrê ma piya emegê xo, seba çiyanê binan zay mekıme, xo mexecelnıme.
Bêrê ma xızmeta kamiya xo, rastiya xo bıkıme ke, wa gewendê Tırkan ebe ma kay mekerê.
Bêrê ma kayê nê gewendan serê xo ra bercıme, bıqedênıme.
Hata ke ma serbest mebıme, vatê ‘bıratiye-mıratiye, hastiye-mastiye’ nêbeno, zur o.
Kes ma endi mexapno, ma, endi mexapime.
Ju şar ke, wayirê idare u iradê xo me bo, kes heq u huquqê ê şari qebul nêkeno.
İdare u iradê ju şari ke çini bo, xo ra heq u huquqê xo çino.
Heq u huquqê ju şari ke çini bo, xo ra bıratiye u huquqê bıratiye ki nêbeno.
Huquqê bıratiye ke çini bo, xo ra bıratiye nêbena, zur o.
Bêrê ma endi nê zuran ra xo raxelesnıme.
‘Derd’ ê ma wo, derman mayi me.
Dermanê derdê ma, ma yime.
Bêrê ma derdê xo ra bıbıme derman.
Bêrê ma qederê ma wo ke bınê bandora dewlete Tırki de ro, ‘wijdan u şewqatê’! inan ra, wastena inan ra, ‘insaf u merametê’! inan ra mevırdıme.
Xo vira mekıme ke, ma kesi ra çiyê pars nêkenime.
Dınya aleme ra çı heq u huquq lazım o, ma ki naye wazenime.
Dınya aleme, zanena ke, ma neheq nime, dewleta Tırki neheq a.
Dınya aleme zanena ke, ma zonê kesi qedexe nêkerdo, kamiya kesi inkar nêkerdo, welatê kesi nêgıroto,talan u wêran nêkerdo.Hama naye pêro dewleta Tırki ma ra kerdo u keno.
Bınê bandoriye, zon u kamiye inkar u qedexe kerdene, şerm o, guna wo.
Na mordemiye, na insanetiye niya.
Bêrê ma verba nê şerm u xederiya dewleta Tırki de, bıbıme ju veng.
Vengê xo piya berz bıkıme, piya kar bıkıme.
Bêrê ma ragêrıme rastiya xo.
Rastiya ma, kamiya ma, zonê ma ke me bo, weşiye u rındiya dınya aleme ma ra çı?
Kultur u edebiyatê ma, name u vatê ma ke bıqediyo, ma ke bıqedime, biyena şarê binan ma ra çı?
Şıma zonê şari (Tırki, Franski, İngilızki, Almanki) mısenê, hama şıma zonê xo ke nêmısenê, çı qimetê xo est o?
Şıma bı destê xo, domananê xo asimile kenê.
Ebe no hal, şıma alım-malım,zane-mane’ bı bê ke se beno? Çı qimetê xo est o?
Bêrê ma no qomplesko xırabın, na quretiya lanete, zere u aqılê xo ra duri bıkıme.
Bêrê ma xo ra hes bıkıme.
Bêrê ma heskerdena zon u kamiya xo bızanıme, bıkıme zerê xo.
A heskerdene ma bı xo yime.
A heskerdena ma, ma ra duri kerdê.
Bêrê ma ragêrıme heskerdena zon u kamiya xo.
Rayêde bine çina.
Çarêde bin çino

Nuşteyo verênİlhami Sertkaya – PEPUGE, ZERÉ MI DE WANENA
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.