Naye inam bıkerê; PEPUGE ZERÉ MI DE WANENA.
Şıma Pepuge nêdiyê, mı, diya.
Çımê pepuge de, rêça koyan u dewanê ma est a.
Vengê aye de, nalina bırayê xo, kerdena trajediyê xo est a.
Se ke şıma zanenê, Pepuge, seba kengeri, bê zaneye, bırayê xo kışta.
Dıme ra fam kena ke, Bıra merd o.
Ebe destê xo, bırayê xo kışta.
A roje ra nata, na waye, bırayê xo ra, biya Pepuge.
Neqebanê warê Pircanan de, (Waro ke, ez maya xo de biya) waxto ke mı vengê Pepuge heşêna, ne mı aye, ne aye mı fam nêkerde. Seran ra tepya, o neqebe de, eskeran, xalê mı kışt.
Namê xalê mı Hesen bi, bejna xo bari, çımê xoyê qıjkeki bırqiyêne.
Maya mına rebene, vengê pepuge, o neqeb de bırna.
‘VINDE EZ BIRAYÉ XO RA BIWANİ PEPUG’!
Maya mı berba, berba..
Dılopê hêstırê maya mı, serê pelanê bıran ra rışiya.
Pepuge vınete, maya mı berba.
Seran ra tepya, Eskerê de bin, Qereqolê Çewlıgi de, apê mı kışt.
Na dolıme, Pepuge vınete, piyê mı berba.
Namê eskeriyo ke xalê mı kışt ‘Ereb’ bi.
Namê serdarê eskeriyo ke apê mı kışt ‘Durmuş Çoşkun Kıvrak’ bi.
‘Ereb’ sax, şıma sılamet
Namê ‘Durmuş Çoşkun Kıvrak’i hata kıştena ‘Ugur Mumcu’ veciya.
O hina sax, şıma sılamet.
Ma, qefeliyayime.
Dewê ma vêşayi, goniya ma, awa deran ra rışiya, vıla bime, Veciyayime koyan, veciyayime şukan, rayan,veciyayime xeribiye..
Xezeb, berbayene, hesrete, xeribiye kewte para ma.
Ma, zê zonê xo, bime lete bı lete.
Kamiya ma, coka ke ‘belek a’!
Şıma ‘kamiya beleke’ zanenê?
Pepuge, endi bırayê xo ra zêde, halê ma ra wanena, şıma zanenê?
Pepuge zonê ma de wendêne, Tırki nêwendêne.
Rengê hêstırê çıman juyo, hama rengê zonan u kamiyan ju niyo.
Kotiyo, kamiya mı, kotiyo zonê mı?
Ma, kamiye u zonê xo de zaf vısiyayime.
Rastiya ma koti de ra, zonê ma koti de ro?
Kami kamiya ma, ma ra niya vısna?
Pepuge bırayê xo, bê wastene u bê zaneye kışte, ma bı zaneye, bı wastene zonê xo mekışıme.
Mevacê ‘ma bı zaneye zonê xo kışenime’.
Şıma ke nêwazenê zonê ma bımıro, tenya ju çare, tenya ju raye est a.
Mı ra mevacê ‘o çare çık o’, şıma naye zanenê.
Eger ke şıma mezanıtêne, mı şımar a vatêne.
Hama şıma zanenê.
Mordem ke ‘bı zaneye’ zon u kamiya xa ra xırabiye bıkero, O mordem, tırajediyê vindibiyena xo de ro.
Vindibiyene ravırdıme, rastiya xo qezenc bıkıme.
Bê kamiye cavırdıme, bıresime kamiya xo.
Mevacê ‘kamiya ma est a’.
Kamiya ke serbest mebo, qimetê a kamiye çin a.
Xemê kesi niyo ke ‘kamiye u zonê ma est o- çin o.
Waxto ke ma zonê xo qesi kerd, o waxt kamiya ma verba serbestiye şona.
Zon, bıngehê kamiye wo.
Kamiye, serê kokê zoni de, xo wesênena.
Mı, bı no derdo xori, pepuge da vınetene.
Derdê Pepuge, lêwê derdê mı de, zê ‘doman’ mend. Pepuge mı ra şermayiye, vengê xo bırna, kewte zerê mı.
Pepuge mı ra va ke;
‘’Wekile vengê mı tiya, endi tı ebe namê mı bıwane’.,
Şıma vengê Pepuge heşênenê?
PEPUGE, ZERÉ MI DE WANENA.
İlhami Sertkaya
