Roja dişeme (24.06.14) maçê Îtalya û Ûrûgûayî yê şampîyonîya dinya de ekîbê Ûrûgûayî maç bi skorê 1-0 ra girewt û nîya Îtalya şampîyonîya dinya ra eşte teber.
Labelê netîceyê kayî ra zêde hêrişê futbolbazê Urûgûayî Luîs Suarezî bala seyrkerdoxan ante. Deqaya 79. de Suarezî hermeyê futbolbazê Îtalya Gîorgîo Chîellînî gid kerd. Ecêb o bî ke qet yew provokasyonê Chîellînî sey sebebê nê hêrişî çin bî, Suarezî cayê bêgude de defanskerdoxo îtalyanij gid kerd. Çîyo balkêş no yo ke hakim no hereketê Suarezî nêdî û herçiqas ke Chîellînî rêça didanê Suarezî musnaye, Suarez kayî ra nêerzîya. Deqaya 82. de defanskerdoxê Ûrûgûayî Dîego Godîn ke Atletîco Madrîd de kay keno, kornerê Ramírezî dima pê sere ra gol eşt.
Maç ra tepîya FÎFA qeydanê vîdeoyan ra Suarez 9 kayanê şampîyonîya dinya ra eşt û çar aşmî kî her kayê ekîbê klûbê xo FC Lîverpoolî rê qedexe kerd. Badê, Suarezî roportaj de kerdena xo darde we û va ke ey kes gid nêkerd.
Çi esto ke na reya verêne nêbîye ke Suarezî hêrişê gidkerdişî kerd. Naye ra ver di futbolbazê bînî kî gid kerdbî. Wexto ke Suarezî Ajax Amsterdam (Hollanda) de kay kerdêne, ancîya yew futbalbazo bîn qurbanê hêrişê ey bî. Ekîbê klubê xo Lîverpool de kî kaykerdoxê Chelseayî Îvanovîç gid kerdbî.
Nikä no layek beno mirozin ke vana kutne zone kirmancu.