Goreyê yew vilaweka Îxtîyarîyanê Seveknayîşê Tebîetî yê Dêrsimî ra, şîrketê Darenhes A.Ş. ke girêdayeyê şîrketê Lîmakî yo, seba viraştişê awbendan dewijanê Pêrre rê mektube rusnaye ke dewe terk bikerê.

Şîrketê Lîmakî bi xo taşeronê dewlet o û heta nika Dêrsim de tebîet û dorûver bi hîrê barajan xeripna. Nika şîrketê Darenhes A.Ş. ke kî parçeyê Lîmakî yo, wazeno bi awbendê Pembelîkî ra Gelîya Pêrre binê awe de verado. No semed ra şîrketî dewijanê Pêrre rê yew mektube rusnaye ke dewe 1 aşme de terk bikerê. Eke dewijî ban û hardê xo terk nêkenê kî, şîrket vano ke pê cendirme dewe do bêro tal kerdene. Mektube hetê mudirê pêroyî Turgut Gulçatî ra ameye îmza kerdene.

No sebeb ra dewijê Pêrre venga pêro dêrsimijan da ke deyax bidê. Îxtîyarîyanê Seveknayîşê Tebîetî yê Dêrsimî da zanayene ke ê mucadeleyê xo duştê Lîmakî de dewam kenê û destûr nêdanê ke dewî sey serranê 90an de bi zor ra bêrê tal kerdene.