Cendirme û eskeranê dewleta tirke ewro saeta 06:00 de seba wedaritişê heykelê serdarê namdarî yê PKK Mahsum Korkmazî (Egîd) yew operasyon viraşt. Seba ke qisimê şarî duştê wedaritişî de vejîya, pêrodayîş de cendirmeyan yew kes kişt, xeylê kesî kî bîy dirbetin. 

Tayê melumatan ra gore bi hezaran kesî mudaxeleyê esker û cendirmeyan kerd. Eskerî kî bi helîkopter û panzeran kewt goristan. Sey netîce yew kes ame kiştene, xeylê kesî kî bîy dirbetinî. Nameyê xortê protestokerdoxî ke canê xo da, Mehdîn Taşkin o. Taşkin 24 serre de bî, raporê otopsî ra gore yew qerşune gina sereyê ey ro. Meyîtê Taşkinî ewro Licê de defn beno, dirbetinî kî nêweşxaneyê Unîversîteya Dîcle de tedawî vînenê.

Goreyê îddîayanê Serekîya Erkanê Pêroyî yê Tirkîya, mabênê protestokerdoxan de çekdarî estbîy, coka hetê eskeran ra mudaxele bîy. Labelê çapemenîya kurde de serebûtî nîya nêbîy: eskeran bi bombayanê gazî û guleyanê rastikenan hêrişê protestokerdoxan kerd. Dima, heykel bi şidet ra ame rijnayene. Xora, goreyê raporanê Komela Heqanê Merdiman (ÎHD) ra, eskerê tirkî zafê rey protestoyan de hêrişê şarî kerdîbî.

Dewa Sisê yê Licê de par seba şehîdanê PKK yew goristanê bi nameyê “Şehîd Amed û Şehîdîya Hêvîdarî” ame viraştene. Semedê merasîmê serrgêra 30. yê PKK 15. tebaxe de Sisê de yew heykelê serdarê namdarî yê PKK Mahsum Korkmazî ame ronayene. Dima hetê serdozgerîya Tirkîya ra derheqê ronayîşê heykelî de sey “propagandaya rêxistina terorî” yew cigêrayîş virazîya. Sey netîce Dadgeha Pêardişî ya Licê qerar da ke heykel “eserê gun” o, coka gerek bêro rijnayene.