Badê ke dewlete qanûnê “OHAL”î vet û nê qanûnî ra dima zî dest eşt beledîyayanê bajaranê kurdan ser û herinda serekanê înan de qeyum tayîn kerd, heme bajaranê kurdan û xaseten zî Dîyarbekir de xebatê heme sazgeh û dezgehanê kurdan zî dayî vindarnayîş. Nê serebûtî ra dima xebata ziwan û kulturî zî vinderte. Hema-hema heme sazgehanê ke xebata kultur û ziwanî kerdêne, padîyê. Tayê kovaran zî xebata xo vindernaye. Têreyde çend televîzîyonî zî nêeşkayê xebata xo bidomnê. Bi no tewir cuya ziwan, kultur û medya ya ke nê warî de xebate kena, pêro pîya yan ameya vindertiş yan zî padîyaya.
Bi nê serebûtî tena zerar nêda xebata nê sazgeh û dezgehanê kurdan. Bi no qayde hetê psîkolojîkî ra zî moralê şarê ma xeripîya. Hîna zaf zî kesê ke nê sazgeh û dezgehan de xebetîyêne, zerarêko zaf gird dî. Zaf mamostayê ke nê warî de gure kerdêne, wezîfe ra ameyî eştiş. Unîversîteyê ke tede beşê kurdolojî bibî, mamostayê înan wezîfe ra ameyî eştiş. No proses de nuştiş û wendişê kurdkî zî sist bî.
xaye û armancê na grûbe averberdişê kirmanckî yo
La na rewşa xirabine a roje ra hetanî ewro dewam nêkerd. Kesê ke verê nê qanûnê OHALî de na xebate kerdêne, mudetêk ra dima na rewşa xirabine ferq kerde û xo ant pêser û ca û mekananê bînan de reyna dest eşt a xebata xo.
Nika kesê ke dildarê ziwan û kulturê kurdkî yê, cayanê taybetîyan, de sey kafe û waranê bînan de, deyîrbazan dawet kenê û konseranê şenikan amade kenê. Nê kesî ge-ge zî roja wendişê hîkaye û şîîran amade kenê, roja îmzayê kitaban û kitabê ke newe nusîyenê, roja daşinasnayîşê înan virazenê. Tayê cayan de zî kursê kurdkî yenê dayîş.
Na des rojî verê cû Dîyarbekir “Paskofî Cafe” de Xoser Rayîrwan konserêko şenik pêşkêşê heskerdoxanê muzîkê kirmanckî kerd. No konser hetê “Grûba Morceleyanê Kirmanckî” ra amebî organîzekerdiş.
Dîyarbekir de çend ciwanê heskerdoxê kirmanckî yenê pêser û bi nameyê “Morceleyê Kirmanckî” grûbêke ronanê. Ez ke zana, xaye û armancê na grûbe averberdişê kirmanckî yo û mîyanê komelê kurdan de berzkerdişê îtîbar û prestîjê kirmanckî yo.
Ewro kirdkîya ma hema zî haya sewîyeya tesbîtê UNESCOyî de. UNESCO 2009 de, yanî des serrî verê cû rewşa kirmanckîya ma tesbît kerdbî. No tesbît zî kirdkîya ma rê sekerat a. Eke ma kirmanckîya xo rê wayîr nêvejîyê, eke ma aye weye nêkerê, eke ma kede nêdê ci, kirdkîya ma sekerate ra nêxelesîyena!
Eke ma kirmanckîya xo rê wayîr nêvejîyê, sekerate ra nêxelesîyena!
Na grûbe seba weyekerdiş û averberdişê ziwan, kultur û hunerê kirmanckî yew nimûne yo. Kirmancê ke bi tepaymendişê ziwanê xo erqelîyê û na rewşa xirabine ra dejenê û oxeş nêkenê, ganî ked û rence bidê ci û ser o bixebetîyê.
Na grûbe zî wina kerd û seba ke derd û dejê kirmanckîya ma bineyke şenik bikerê û goreyê hêz-qewetê xo yew kede bidê ci, xo mîyan de organîze bîyê û na grûbe awan kerda.
Na grûbe roja ke awan bîya, hetanî na roje çar çalakî viraştê. Gûube çalakîya xo ya verêne bi nameyê Şewa Şîîran a Kirmanckî tarîxê 03.11.2018î “Gilgamêş Kitab Cafe” de şewêke organîze kerde. Na şewe de Bedrîye Topaç, Denîz Gunduz û Omer Barasî şîîrê xo wendî. Çalakîya dîyine reyna bi organîzekerdişê na grube eynî kafe de tarîxê 09.12.2018î de Celê Bolizî konserêko şenik da. Çalakîya hîrêyine reyna Gilgamêş Kitab Cafe de tarîxê 23.12.2018î de hunermenda ciwane Sasa Serap û şaîro pîl J. Îhsan Espar bîbî meyman. Nê her dî meymananê ma yê erjayeyan ra Sasa deyîrî vatî û Esparî zî şîîrî wendî.
Na grûbe çalakîya çarine de hunermend Xoser Rayîrwanî kerd meymanê xo. Xoser roja 23.02.2019î “Paskofî Cafe” de gîtara xo reyde bi zarêko weş deyîrê kirmanckî îcra kerd.
Nê çar çalakîyan de zî şarê ma yo heskerdoxê kirmanckî paştî da na grûbe û nê her di kafeyî zî bîyê de bîyê qirpîkî ra. Ez hêvî kena ke na grûbe ciwananê ma rê bena nimûne û grûbê sey na grûbe vêşî benê. Û na grûbe rê zî serkewtiş û emrêko derg wazena.
