“Grûba Xebate ya Vateyî” kombîyayîşê xoyo 19. viraşt – Mehmud Nêşite

“Grûba Xebate ya Vateyî” kombîyayîşê xoyo 19. Dîyarbekir de Otêla Grand Gulerî de viraşt. Na grûbe şeş aşman ra reyêk cayêk de kom bena û tayê çekuyan û terman standardîze kena. Nê çarês serrî yê ke na grûbe bi no usûl xebata xo domnena. Hetanî nika 19 reyî kom bîya û nêzdîyê 7-8 hezar çekuyî standardîze kerdî. Bê standardîzekerdişê nê çekuyan tayê termî zî açarnay kirmanckî (zazakî) û usûl û quralanê rastnuştişî ser o zî vinderta.

Grûbe kombîyayîşê xoyo 19. zî bi no usûl Dîyarbekir de viraşt. Grûbe na rey “Tayê Çîyê Muhîmî”, “Termê Beledîye û Şaristanî” û “Nameyê Meslegan” kerdî rojeva xo û ser o munaqeşe kerd.

Sey heme kombîyayîşan no kombîyayîş zî Munzur Çemî îdare kerd. Roja yewine derheqê rojeve û derheqê xebata “Buroyê Vateyî yê Dîyarbekirî” de malumat ame dayîş. Dima derheqê tayê çîyanê muhîman de M.Malmîsanij seba rastnuştişî babetêka tenge ser o vindert û na babete ser o munaqeşe virazîya. Grûbe dima dest bi munaqeşeya babeta “Termê Beledîye û Şaristanî” kerd.

Kombîyayîşî roja 21ê na aşme de dest pêkerd û hetanî roja 24ê na aşme dewam kerd. Nê çar rojan de endamê nê kombîyayîşî her roje saeta 9:00 de salona na otêle de kom bîyêne û hetanî saete 17:30 babeta terman munaqeşe kerdêne.

Na rey nê 21 kesî beşdarê nê kombîyayîşî bîyî: Cemal Pîranij, Denîz Gunduz, Doxan Karasu, Ehmedê Dirihî, Huseyîn Kulu, Îshaq Tepe, J. Îhsan Espar, M. Malmîsanij, Mehemed Selîm Uzun, Mehmud Nêşite, Munzur Çem, Muzafer Xeylanij, Netîce Altun, Polat Aydin, Roşan Lezgîn, Serdar Bedirxan, Seyîdxan Kurij, Silêman Yilmaz, Şukru Urgun, Tekîn Agacik, Zulkîf Demirtaş.

Seke tay wendoxî zî zanê, na babete ser o verê cû zî di kombîyayîşî virazîyaybî. Ê her di kombîyayîşê verênî hetê “Beledîyaya Şaristanê Girdî ya Dîyarbekirî” ra organîze bibî. Nê kombîyayîşan ra kombîyayîşo verên seba lehçeya kurmanckî û ê dîyin zî seba lehçeya kirmanckî (zazakî) organîze bîbî. Nê her di kombîyayîşan de zî cîya-cîya kesî ameybî pêser û nê termî tirkî ra açarnaybî kurmanckî û kirmanckî.

O wext tayê medya û tayê keyepelan de zafane zî yê kirmanckî ser o rexneyê zaf tujî virazîyaybî. Hetanî ke nê medya û keyepelan goreyê zanayîşê xo tayê nimûneyî zî daybîy.

Nê termî pêro pîya 270 hebî bî. Grûba Xebate ya Vateyî no kombîyayîşê xo de nê terman ra hebêk-di hebî tede ney, heme termî açarnay kirmanckî. Ez wazena nê terman ra çend heban pêşkêşê şima wendoxan bikerî.

• basin odasi: odaya çapemenîye
• basin yayin bürosu: buroyê çapemenîye û weşanî
• basin yayin şube müdürlüğü: mudirîya beşê weşan û çapemenîye
• basin yayin ve halkla ilişkiler müdürlüğü: mudirîya çapemenîye-weşan û şarî reyde têkilî
• başkan yardimcisi: 1) hetkarê/a serekî 2) hetkarê/a sereke
• bilgi işlem ve bilgi yönetimi müdürlüğü: mudirîya îdareyê zanakirarî û zanayîşî
• bütçe ve finans şube müdürlüğü: mudirîya beşê butçe û fînansî
• büyükşehir belediye başkani: sereka/ê beledîyaya şaristanê girdî
• büyükşehir belediye meclisi: meclîsê beledîyaya şaristanê girdî
• canli hayv.bors. ve mezb. şube müdürlüğü: mudirîya beşê pawitiş/seveknayîş û kontrolê dorûverî
• kanalizasyon dairesi başkanlığı: serekîya dayîreyê kanalîzasyonî
• kanalizasyon işletme, bakım ve onarım şube müdürlüğü: mudirîya beşê xebitnayîş/sazgeh, ciewnîyayîş û tamîrê kanalîzasîyonî
• sağlık işleri dairesi başkanlığı: serekîya dayîreyê karanê weşîye
• sivil savunma uzmanlığı: pîsporîya pawitişê sivîlî
• sosyal hizmet ve yardım işleri müdürlüğü: mudirîya karanê xizmetê cematkî û hetkarî.

Na grûbe goreyê usûlê xo roja peyêne yê kombîyayîşî de tarîx, rojeve û cayê kombîyayîşêko bêro tespît kena. No kombîyayîş de zî winî kerd. Grûbe do şeş aşmî badî pê, yanî kombîyayîşo 20. Mêrdîn de virazo û do termanê sînema, tîyatro, muzîk û konsertuwarî ser o vindero.

Mehmud Nêşite