Dêrsim de hewt gerîllayî kişîyay

0
227

Qezaya Dêrsimî Pilemurîye de pêrodayîşo werteyê artêşa tirke û hêzanê HPG de di rojan de hewt gerîllayê HPG amey kiştene. Hêrişê eskerîya Tirkîya hîna bi tîmanê taybetî û helîkopteran dewam keno. Cayê ke tede pêrodayîş vejîya, hîna bi helîkopteranê Kobra yenê bomba kerdene.

Dormeyê (yew) grûba vîst gerîllayanê kurdan hetê da-hezarî eskeranê tirkan ameybî girewtene. Naye ser o pêrodayîş vejîya ke di rojî dewam kerd û hîna nêqedîya. Îdîaya artêşa tirke ra gore heta nika hewt gerîllay amey kiştene. Dêrsim de aşmanê peyênan de xeylê reyî operasyonê eskerîya Tirkîya amey viraştene.

Na xebere ser o Dêrsim de xeylê kesî bi beşdarîya wezîra wedarîya ya Dêrsimî Edîbe Şahîn û namzedo xoser Ferhat Tunçî ra verê xeymeyê çareserîya demokratîke de amey têlewe û no operasyon protesto kerd. Serekê BDP yê Dêrsimî Suat Demîrî merdişê hewt gerîllayanê kurdan ser o hîrê rojî şîn degirewtene îlan kerdo.

Ferhat Tunçî kî no protesto de va ke “Dejê ma giran o. Ey dewlete, na mesele ti bi kiştene besenêkena biqedênê. Naye şima hîna fehm nêkerd… Şaro kurd jê (sey) 30 serrî raver nîyo, ewro cayêde daha rind der o.”

Rojnameyanê Tirkîya zêderî na xebera kiştişê gerîllayanê kurdan bi şabîyayîş neşr kerde. Keyepelanê medyaya tirke de şîrove û fikrî ke neşr bîy, musnenê ke refleksê şarî na mesele ser o ju (yew) nîyo.