Duştê teda û tehdîdê hukmatê Tirkîya de parlamentoyê Fransa qerar da ke înkarkerdişê jenosîdê armenîyan suc o. Naye ra tepîya cezaya înkarkerdişê jenosîdê 45.000 Euroyî yo.

Serra 2001 de Fransa qirkerdişê armenîyan jê (sey) jenosîd qebul kerdîbî. Na hewte kî persê wekîla partîya UMP Valérîe Boyer ra de bi rayanê partîyan ra qanûnê cezakerdişê înkarî ameybî qebul kerdene. 128 wekîlan raya pozîtîfe daye, 86 kî duşt de mendî, 196 kî rayê redî bîyê. Partîya UMP, sosyalîst û komunîstan dest da qerar. Partîya dorûverî (keskan) duştê qerarê parlamentoyî de vindet.

No qeraro resmî ra jenosîdê armenîyan jenosîdê yahudîyan beno têduşt. Des serran ra tepîya lobîyê armenîyan besekerd ke no qanûn senato ra bivîyarno. Senatorê UMP Roger Karoutchî derheqê nê qerarî de qisey kerd va ke “Vanê ke mesûlîyet yê tarîxnasan o. Tarîxnasî senî besekenê ke mesûlîyet bicêrê? Ê her çî ser o cîya-cîya fikirînê. (…) Înkarkerdişê jenosîdê yahudîyan jê (sey) suc qebul beno, la yê jenosîdê armenîyan ney? Noca (naza) de têduştîye çin a. Qetlîam qetlîam o, qurban kî qurban o. Eke tarîxnasî nêkenê, sîyasetkarî kî nêkenê, ma kam keno?”

Senatora bîn a UMP Sophîe Joîssaînsî kî bale ante (onte) Boyer ser ke no qanûn amade kerdo. Boyer rastê xeylê tehdîd û heqeret ameye. Aye wexê hêrişanê Tirkîya de vatena antî-armenî, antî-yunan û antî-kurd rexne kerde Wekîlanê ke derheqê girsîya Tirkîya de qisey kerd, cewabê înan nîya da: “Hurmetê vîrî hurmetê pereyî ra tenêna muhîm o.”