Rojnamegero armenî Hrant Dînk roja 19. çeleyî 2012 serrgêra xoya 5. ya kiştişî de hetê dorê 50.000 kesan ra ame yad kerdene. Dînk 19.01.2007 de hetê merdimêde (mordemêde) tirk ameybî kiştene. Esnaya pêserameyîşê yadkerdişî de parolayî jê (sey) “Seba Hrantî rastîye”, “Ma pêro armenî yîme” amey eştene.

Kiştiş ra ver Hrant Dînkî seba heqeretkerdişê Tirkîya hetê dadgehe ra ceza girewtîbî, naye ra dime Dînk hetê rastgir û radîkal-faşîştanê tirkan ra jê (sey) dişmenê welatî ameybî îlan kerdene.  Dadgeha Îstanbulî cezayêda şenike daybî sucdaranê kiştişê Hrant Dînkî û naye ra rexneyê miletî ant (ont) xo ser. Herçiqas ke xeylê polîs û merdimanê (mordemanê) dewlete no kiştiş de rol kay kerd, dadgeha tirke rîyê kêmasîya delîlan ra tena cezaya 20 serran da ju (yew) kesî û juna (yewna) sucdarî cezaya muebbede girewte.