Festîvalê Kulturî ya Elewîyanê Dêrsimî emser reya 6. yeno viraştene. Festîval mabênê 30. û 31. gulane 2014 şaristanê Almanya Düsseldorf de yeno kerdene. 

Raver ra no festîval şaristananê Frankfurt, Rüsselsheîm, Maînz  ûsn. de ameybî viraştene. Pêro dêrsimijî welat û duwelan ra dawetkerde yê. Heyetê îdareyî yê festîvalî da zanayene ke festîval “kombîyayîşê pêro şaran o ke no cografya ser o ciwînê û îtîqadê xo rê wayîr vejînê, Dêrsim ra heta Qoçgîrî, Gimgim ra heta Meletî, Semsûr ra heta Mereş-Bazarcix û Çorum.”

Programê festîvalî de derheqê tarîx, nasname û sîyasetê Dêrsimî de, aye ra kî dot derheqê dînê elewîyan de panelî estê. Qiseykerdoxan mîyan de nuştox Munzur Çem, hemserekê BDP yê Dêrsimî Mehmet Alî Bul û Nurhayat Altun estê, sewbîna kî wekîlê BDP yê Mûşî Demîr Çelîk, serekê Komela Pîr Sultan Abdalî Kemal Bulbul, hemserekê FEDA Alî Koyluce û Komelê Neweraviraştişê Dêrsimî ra Haydar Işik tey beşdar ê.

Pîr Riza Yagmur roja şemîye de bi gulbang festîval keno ra. Xeylê hunermendê namdarî sey Ozan Serdar, Ahmet Aslan, Alî Sîzer, Cîhan Çelîk ûêb. bi kilam û hunerê xo festîvalî xemilnenê.

Festîvala 6. ya Kulturê Elewîyanê Dêrsimî